Lo cap de l’esquèrra abertzale (esquèrra patriotica basca), Arnaldo Otegi, viu, dempuèi dimenge, encara mai isolat que pendent aqueles tres darrièrs ans qu’es dins la preson de Logronh (Espanha). La comission disciplinària del centre penitenciari l’a punit per aver enregistrat dins la preson un discors amb la siá votz e que foguèt emés dissabte passat dins lo grand acte de campanha electorala del partit EH Bildu. Dins aquel discors (vidèo), Otegi demandava lo vòte per Bildu, e mai parlava de las escasenças de la crisi e de la situacion d’Escòcia o Catalonha, per fin de capitar democraticament al Bascoat.
 
Lo dorsièr disciplinari contra Otegi compren de mesuras preventivas coma la suspension de las vesitas dels familhals, dels messatges, de las letras e de las telefonadas. Coma resultat, dimenge foguèt lèu enebida la vesita de sa femna qu’aviá ja viatjat fins a la preson. 
 
Per ara, se sap pas quant de temps contunharàn aquelas mesuras preventivas, que dins la practica isolan Otegi de l’exterior. Otegi es en preson dempuèi 2009, acusat qu’es d’aver ensajat de rebastir lo partit illegalizat Batasuna.