Lo president de la Generalitat de Catalonha, Carles Puigdemont, compareisserà uèi a 18h davant los deputats catalans per “parlar de la situacion politica actuala”. Es previst que, pendent aquela sesilha, lo president demande al parlament qu’aplique lo resultat del referendum del 1r d’octòbre passat e proclame l’independéncia.
 
La societat civila es lèsta per manifestar e seguís l’actualitat, mai que mai suls rets socials amb l’etiqueta #10ODeclaració, del temps que lo govèrn espanhòl e los partits espanholistas fan de menaças grèvas dont qualques unas passan l’òsca.
 
 
Las menaças del Partit Popular
 
Davant aquela possibilitat, la reaccion espanholista foguèt ièr fòrça energica. La vicepresidenta del govèrn espanhòl, Soraya Sáenz de Santamaría, diguèt que “la declaracion d’independéncia aurà pas cap d’efièch” e que se Puigdemont la declara, lo govèrn espanhòl “prendrà de mesuras”.
 
Mai luènh anèt lo vicesecretari de comunicacion del Partit Popular, Pablo Casado, que comparèt la declaracion d’independéncia d’uèi amb la que se tenguèt fa 83 ans. “L’istòria se deu pas repetir”, çò diguèt en afirmant que “qui declare l'independéncia pòt finir coma Companys en 1934”.
 
L’èx-president de la Generalitat, Lluís Companys, foguèt mes en preson après declarar l’independéncia en 1934. Sièis ans pus tard seriá fusilhat al castèl de Montjuïc per òrdre de Franco. Dimenge que ven, 15 d’octòbre, se complirà los 77 ans de son execucion.
 
 
Non al dialòg
 
Casado refusèt lo dialòg amb l’executiu catalan qu’el apelèt “los putschistas de la Catalonha del sègle XXI”, e afirmèt qu’Espanha acceptariá pas cap de dialòg, car “es pas Sodan ni Iogoslavia”.
 

Ni els insults ni les amenaces doblegaran la voluntat del poble de Catalunya expressada democràticament pic.twitter.com/laq92Evaen

— Esquerra Republicana (@Esquerra_ERC) 9 d’octubre de 2017

 
 
Lo Comitat de las Regions avertís Espanha
 
Lo president del Comitat de Regions de l'Union Europèa, Karl-Heinz Lambertz, mandèt ier un messatge net e clar al govèrn espanhòl, en alertant que lo conficte amb Catalonha se podiá pas resòlver sonque amb las leis e l’usatge de la fòrça. Lambertz diguèt pendent una conferéncia de premsa que “cal comprene las raices istoricas d’aquela mena de questions per saber çò que se passa. Los problèmas d’aquela sòrta se pòdon pas resòlvre amb la fòrça, que siá militara o policièra. Çò que cal, abans tot, es lo dialòg; se sèire a l'entorn d’una taula e ensajar d’avançar devèrs un acòrdi”.
 
 
Sesilha extraordinària al Conselh de l’Euròpa
 
De son costat, lo Conselh de l’Euròpa farà dijòus venent una sesilha extraordinària sus la question de Catalonha e Aran. Aquela organizacion de 47 païses a pas res a veire amb l’Union Europèa e sa tòca es de defendre los dreches umans, las democracias parlamentàrias e l’identitat europèa.
 
 
Non-reconeissença de França
 
França reconeisserà pas la declaracion d’independéncia. Ansin o diguèt la secretària d’estat dels afars europèus, Nathalie Loiseau. “Se i a una declaracion d’independéncia, serà unilaterala e serà pas reconeguda. Aquò supausariá automaticament la sortida de l’Union Europèa”, çò assolidèt Loiseau a CNews.