Actualitats
Lo Tribunal Europèu dels Dreches Umans a condemnat Espanha per las torturas contra Martxelo Otamendi
La cort d’Estrasborg planh que l’estat espanhòl aguèsse pas examinat pas las denóncias de tortura del jornalista quand barrèron lo jornal basco Egunkaria
Lo Tribunal Europèu dels Dreches Umans a condemnat l’Estat espanhòl a pagar una indemnizacion de 24 000 èuros al director del jornal basco Berria e èx-director d’Egunkaria, Martxelo Otamendi, perque Espanha a pas res examinat, après las torturas qu’Otamenti patiguèt pendent la siá arrestacion en 2003 en mans de la Gàrdia Civila.
La tresena seccion del tribunal conclutz qu’Espanha escarniguèt l’article 3 de la Convencion Europèa de Dreches Umans, que proclama lo drech de non patir cap de tractament degradant o inuman.
Lo jornalista foguèt arrestat en febrièr de 2003 en cò sieu per òrdre de l’Audiéncia Nacionala espanhòla, que l’acusava del delicte d’apertenença a una banda armada, amb los jornalistas e èx-directors d’Egunkaria Joan Mari Torrealdai, Iñaki Uria, Txema Auzmendi e Xabier Oleaga. Totes eles foguèron absolguts d’aquela acusacion per la quita l’Audiéncia espanhòla fa dos ans.
Otamendi arribèt a la cort alsaciana après que totas las instàncias judicialas espanhòlas refusèsson los recorses; el denonciava que lo procès en Espanha aviá mancat de garentidas e, doncas, qu’aviá patit una abséncia de defensa.
Ara lo Tribunal Europèu dels Dreches Umans dona rason a Otamendi e condemna Espanha per aver pas fach çò que caliá e per aver pas examinat las denóncias.
En genièr de 2010, Otamendi descriviá las torturas que patiguèt al jornal catalan Vilaweb.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
È, ò, òu ? Los dret-de-l'omistas parisencs professionaus, on sètz ??? Ah, perdon, encuentats endacòm mei. Desencusatz, volèvi pas destorbar....
L'estat espanhòl se'n fot de la condemna pel Tribunal europèu. Çò que voliá era arroïnar Egunkaria e es pas amb 24.000 miserables euros que lo jornal tornarà sortir. De tot bais es tròp tard. Ara, la decision es bona a nivèl personal per Otamendi.
Cal dire que la manòbra que consistís a tocar lo pòrtamoneda per faire calar un jornal es portat a la perfeccion per lo PP e los oligarcas que lo sostenon. A l'ora d'ara, en castelhan, i a pas pus que Público que se pòsca legir, e encara sus la tèla que li a calgut tancar l'edicion papièr. E El País, dont l'independència editoriala malautèja cada jorn un pauc mai, es a mand de fotre defòra 140 emplegats. Se'n manca pas gaire per que los jornals escriches en castelhan se resumissen als pamflets del PP. ABC, La Razón, El Mundo, aqueles mancan pas de dardenas.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari