Los govèrns escocés e britanic signèron diluns passat un acòrdi istoric per la celebracion d’un referendum sus l’independéncia d’Escòcia la tardor de 2014. L’acòrdi foguèt signat a Edimborg pel primièr ministre escocés, Alex Salmond, e lo britanic, James Cameron. La data del referendum es una capitada del Partit Nacional Escocés (SNP), ja que lo Reialme Unit voliá que se faguèsse en 2013. Escòcia accèpta, per contra, que lo referendum prepause una sola question: se los escoceses vòlon èsser independents o demorar dins lo Reialme Unit.

Per dividir lo vòte dels partisans de demorar dins lo Reialme Unit, lo govèrn escocés voliá que i aguèsse una tresena opcion: demandar mai d’autonomia. Se son acordats tanben per qu’i pòscan votar totes los escoceses a partir de 16 ans, e non a partir de 18, coma d’abitud.

Las relacions entre Escòcia e Anglatèrra an mai de tres sègles d’istòria. En 1603 comencèron de partejar la meteissa dinastia e, de 1707 enlà, comptèron amb un solet Parlament, amb sedença a Londres. En 1999 se constituiguèt lo primièr Parlament escocés après gaireben 300 ans, aprovat que foguèt en referendum.

S’es sauput, mentretant, que lo pòrtavotz de la defensa del Partit Nacional Escocés, Angus Robertson, demandarà aquesta setmana que lo congrès del partit, que se debana a Perth, s’acòrde per demandar qu’Escòcia faga partida de l’OTAN, se ven independenta. Los sobeiranistas escoceses èran fins ara opausats a l’OTAN, mai que mai perque vòlon pas d’armas nuclearas. Mas ara, après n’aver parlat amb de dirigents politics e militars de Norvègia, Danemarc e Islàndia (estats essencials per l’estrategia independentista escocesa), dison que seriá un gatge per aqueles païses qu’Escòcia foguèsse membre de l’OTAN.

Per calmar los opausants a aquel virament politic, Alex Salmond diguèt la setmana passada que la nòva constitucion escocesa enebiriá explicitament las armas nuclearas pr’amor de la lucha que l’SNP menèt pendent fòrça decennis contra la basa de sosmarins nuclears britanics que i a dins lo país.