An trobat lo còrs de Santiago Andrés Maldonado dins un fluvi al sud d’Argentina. Maldonado èra portat desparegut dempuèi lo 1r d’agost dins l’encastre d’una protèsta de la comunautat mapuche que foguèt fòrtament reprimida pels gendarmas. Ochanta jorns après la desparicion de l’activista qu’aparava los dreches del pòble mapuche, an trobat son cadavre dins lo flume Chubut, a 300 m en amont de l’epicentre del conflicte, çò rapòrta Radio Mitre.
 
Santiago Maldonado èra un jove de 28 ans de la província de Buenos Aires. Fa qualques meses, decidiguèt de jónher la lucha del pòble mapuche, qu’ocupan una petita partida de l’enòrma proprietat de Luciano Benetton per reclamar lor proprietat ancestrala. Lo 1r d’agost passat, los gendarmas reprimiguèron brutalament una protèsta que revendicava la libertat de lor cap Facundo Jones Huala. Maldonado se trobava demest los manifestants. Alara despareguèt.
 
Es pas lo primièr còp que la comunitat mapuche patís una repression violenta en Argentina. En genièr passat, foguèron d’efièch reprimits quitament amb tir d'armas de las balas realas quand demandavan que los abitants dels dètz pòbles amerindians de la zòna poguèsson utilizar los servicis ferroviaris per rompre lor isolament.