Lo comissari europèu de l’ampliacion, Stefan Füle, e lo primièr ministre kosovar, Hashim Thaci, son arribats a un acòrdi per que Kosova (o Kosovë o Kosovo) prenga lo camin de l’adesion a l’Union Europèa. L’adesion completa es encara luènh, mas Kosova pòt començar dins qualques meses las negociacions per aderir a l’Acòrdi d’Estabilizacion e Associacion. Füle metèt en evidéncia, dins una conferéncia de premsa a Prishtina, qu’ara tot es en mans del govèrn kosovar e que, per l’Union Europèa, i a pas cap d’inconvenient.

Kosova deu menar a tèrme las reformas economicas que l’Union li demanda, mas sap ja que i aurà pas de trebucs politics, bòrd que l’Union Europèa aprovèt la setmana passada l’estudi sus Kosova. Aquel estudi establís clarament que ni la neutralitat de Kosova, ni lo conflicte frontalièr amb Serbia, ni l’oposicion d’Espanha, Eslovaquia e Romania son cap d’obstacle per l’Union. E lo primièr ministre kosovar a esclarzit que l’europeïzacion dels Balcans es l’encastre ont, dins un futur pròche, Serbia e Kosova se tornaràn trobar, mas en condicion d’estats independents.
 
Al delà, lo comissari europèu metèt en evidéncia que la comission e lo conselh accèptan pas que Serbia vòlga metre de condicions a l’intrada de Kosova dins l’Union, sus la basa de las revendicacions territorialas sèrbas.