Tatyana Felgenhauer, adjoncha de direccion a la ràdio Ekho Moskvy, foguèt ièr atacada amb un còp de cotèl dins lo còl dins son burèu mentre que dinnava. La jornalista russa foguèt menada sul pic a l’espital ont se tròba en estat grèu mas pas critic, çò rapòrta la meteissa ràdio. Segon aquelas informacions, la polícia a arrestat lo presumit assalhidor.
 
Felgenhauer es una de las presentairas de la matinala d’Ekho Moskvy, un dels pauques mèdias critics envèrs las politicas del Kremlin, e mai se la ràdio es proprietat de Gazprom, una societat privada que lo govèrn de Putin n'es l’accionari majoritari.
 
Segon los mèdias russes, la rason de l’ataca es pas segura. Pasmens, qualques jornalistas d’aquel meteis son ja estats atacats dins lo passat.
 
Un rapòrt de la television publica russa difusat aqueste mes assegurava qu’Ekho Moskvy e Tatyana Felgenhauer avián trabalhat per d’interèsses estrangièrs abans las eleccions de març. E mai lo rapòrt publiquèt un enregistrament ont la jornalista atacada planhiá las marridas condicions de trabalh dels jornalistas en Russia.
 
Felgenhauer es pas la primièra jornalista victima d’agressions en Russia. Yulia Latynina, una collèga siá d’Ekho Moskvy, quitèt lo país après èsser victima d’un atemptat mancat.