L’actualitat politica de la jornada d’uèi es centrada sul Senat espanhòl e sul Parlament de Catalonha. D’un caire, s’aplicarà l’anullacion de las institucions catalanas e la presa de contraròtle espanhòla dels govèrns de Catalonha e d’Aran. De l’autre, es probable que lo Parlament  de Catalonha responda en levant la suspension de la declaracion d’independéncia e en proclamant la Republica Catalana.
 
Senat
 
Al Senat espanhòl, s’activarà a 10h la suspension del govèrn de la Generalitat de Catalonha, en prenent lo contraròtle de l’educacion e dels mèdias, e en metent jos tutèla las decisions del parlament catalan. Aquela mesura s’efectua segon l’interpretacion que lo govèrn de Mariano Rajoy fa de l’article 155 de la Constitucion espanhòla.
 
 
Darrièr ensag de dialòg
 
Quant al president de la Generalitat de Catalonha, Carles Puigdemont, ensagèt ièr una darrièra oportunitat de dialòg amb l’estat. Ièr de matin decidiguèt de declarar pas l’independéncia e de dissòlver lo parlament en convocant d’eleccions regionalas e demandant en contrapartida que lo govèrn espanhòl tirèsse lo 155. Aquela decision provocava la demission de fòrça elegits e membres de son partit e la rompedura de la coalicion Junts pel Sí (Amassa per l’òc). Totun, los dirigents del Partit Popular insistiguèron per dire que las mesuras contra las institucions catalanas e aranesas s’aplicarián de tot biais, e Puigdemont tirèt sa proposicion.
 
“Ai considerat la possibilitat de convocar d’eleccions e fòrça gents m’an demandat s’o fariái. Es mon deure d’explorar totas las alternativas per trobar una solucion dialogada e pachada. [...] Ai ensajat d’obtenir las garentidas. Cresi qu’ai obrat amb responsabilitat, mas tot aquò a pas obtengut una accion responsabla del Partit Popular, qu’a ensajat de profechar l’ocasion per crear mai de tension.”
 
Dins aquel sens, Puigdemont concluguèt que ven al Parlament de Catalonha de decidir quina deu èsser la responsa  a las mesuras del 155.
 
 
Sesilha extraordinària al Parlament de Catalonha
 
Lo Parlament de Catalonha comencèt ièr a 18h, una sesilha extraordinària per respondre als plans del govèrn de Madrid. Après los parladisses del president e dels representants de cada grop, se presentèron divèrsas proposicions. Los partits independentistas prepausan de far venir efectiva la declaracion d’independéncia, signada lo 10 d’octòbre passat. Mas cèrcan de far la declaracion d’independéncia un còp que lo Senat espanhòl aurà activat lo dich article 155, per tal de far aquela proclamacion “en legitima defensa”.
 
 
Mobilizacions
 
Mentretant, lo pòble es mobilizat e a tornat prene las carrièras. Dimècres, totas las plaças de las comunas de Catalonha e Aran èran comolas de mond per defendre lo modèl de l’escòla publica, mentre que los collectius d’estudiants son en cauma.
 
Uèi, una molonada es davant lo Parlament de Catalonha a la seguida de la crida facha per l’Assembalada Nacionala Catalana (ANC) e Òmnium Cultural per tal de “defendre la republica”.
 
Se se proclama l’independéncia de Catalonha e Aran, es possible que las fòrças de l’òrdre espanhòlas, e quitament l’armada, prengan per fòrça los edificis del govèrn catalan. E mai, lo ministèri public a previst de deténer lo president Carles Puigdemont, que riscariá una pena de 30 ans de preson, en cas que siá arrestat.
 
Podètz seguir l’actualitat a la minuta sul sit d’informacions de TV3.