Aquesta dimenjada aviá luòc lo primièr torn de la Copa del Mond del XIII dins la calor de fin de prima d’Austràlia, Nòva Zelanda e Papoa.
 
 
Los australians marcan lor territòri
 
Aprèp un aire de didjeridó, la partida de dobertura se teniá divendres a Melbourne, amb l’oposicion entre los campions actuals, los australians e los angleses. Los angleses empachèron los australians de desvolopar lor jòc, marquèron los primièrs (tre la quatrena minuta), prenguèron dos ensages abans la pausa (10-4), resistiguèron mas pleguèron dins las darrièras cinc minutas sus una penalitat e un ensag sus intercepcion aprèp una corsa de 80 mètres del centre Josh Dugan: 18-4 al final. De mai, Sam Burges es nafrat al ginolh e indisponible per 3 o 4 setmanas. Cossí arrrestar los cangorós?
 
 
Los Pols plan valents, mas…
 
Dimenge, los Blaus dintravan dins la competicion a Canberra fàcia a Liban qu’ensagèt d’impausar l’espròva de fòrça. Los òmes del Cèdre marquèron pro lèu, mas los Blaus repliquèron per un ensag del centre Ader al tèrme d’una ataca amb 9 passas; Barthau ensacava la penalitat de l’egalitat, mas los libaneses marcavan entre los pals just sus la còrna.
 
Los Blaus tornavan a egalitat sus una passa al pè que vesiá Bergal desvirar la pauma per Ader. Los libaneses metián a profièit una candela per tornar prene 6 punts d’avança. Lo centre de Lesinhan Cardace marcava un ensag mercé a una passa sautada de Julian Bosquet, e Barthau transformava. Tot èra possible! Mas lo dobertura d’NRL Moses ensacava un tombat abans de marcar un ensag aprèp un pichon còp de pè a seguir per el meteis. La messa èra dita e los libaneses clavavan sus un darrièr ensag anecdotic: 29-18.
 
Los Blaus se son mostrats solidaris, inventius, collectius mas aquò a pas sufit. La còla aviá 23 ans de mejana d’edat. De qué bastir se la Federacion capita de montar un calendièr e un projècte coërents. Per la Copa del Mond, es ja adieu als quarts que caldriá un MMMMMiracle per véser los Pols batre Cangorós o angleses. Rescontre venent: Austràlia-França, aqueste divendres 3 sul meteis estadi de Canberra.
 
 
La Fòrça del Sud
 
Dissabte, èra fèsta a Pòrt Moresby, la capitala de Papoa-Nòva Guinèa que recebiá una partida de la Copa del Mond. Pas pus de plaça en venda! L’esquipa locala festegèt l’eveniment en daissent pas alenar los galeses: 50-6. A Auckland, los neozelandeses dominèron Samoa: 38- 8, Fidji foguèt sens pietat pels Estats Units: 58-12.
 
Dimenge, a Cairns, Irlanda dominèt Itàlia 36-12, puèi Tònga se joguèt aisidament dels escoceses amb lors braietas que ramentan los tartans tradicionals: 50-4.
 
 
Plaça al segond torn
 
Lo segond torn de las partidas de pola veirà se debanar:
 
— divendres 3: Austràlia-França, coma o avèm ja dit
 
— dissabte 4: Nòva Zelanda-Escòcia (Christchurch), Anglatèrra-Liban (Sydney), Samoa-Tònga (Hamilton)
 
— dimenge 5: Papoa-Irlanda (Pòrt Moresby) e doas partidas a Townsville: Itàlia-Estats Units e Fidji-Galas.
 
Vos recordam que totas las partidas de la Copa del Mond se pòdon seguir en dirècte sus BeInSport.
 
 
 
 
Alan Roch