En Guaiana se protèsta contra un megaprojècte minièr russocanadenc apelat Montagne d’Or (Montanha d’Aur). Qualques centenats de personas manifestèron durant la vesita del president francés, Emmanuel Macron, en relacion amb lo projècte minièr. Los guaianeses refusan aquel projècte e reclaman lor “degut”. Lo malcontentament popular foguèt reprimit amb duretat per la polícia que lor lancèt de gases lacrimogèns.
 
Los oposants considèran que lo megaprojècte destrutz l’environament, pòrta tòrt a las societats del país e depend excessivament de las fluctuacions de l’aur dins lo mercat mondial.
 
E mai, se respècta pas los dreches dels pòbles indigènas. De representants de las sièis nacions autoctònas del país denóncian que son pas preses en compte quand França pren de decisions sus Guaiana.
 
En mai de tot aquò, Macron a trobat tanben un país colonizat dins una marrida situacion economica e sociala. Es aquò que provoquèt una cauma generala e una protèsta sociala en març passat. Ara, lo collectiu Pou Lagwiyann Dekolé, creat en seguida d’aquelas protèstas, reclama a Macron lo melhorament de las condicions de vida en Guaiana.