Lo govèrn legitim de Catalonha manten son activitat e prepara una procedura contra la politizacion de la justícia espanhòla, çò anoncièt ièr a miègjorn lo president Carles Puigdemont de Brussèlas estant, acompanhat d’una partida de son govèrn. E mai, anoncièt que combatriá politicament la persecucion del ministèri public espanhòl contra los elegits catalans, e accèpta las eleccions regionalas qu’a convocadas lo govèrn de Madrid en Catalonha per respondre politicament a la persecucion de l’estat.
 
Pasmens, Puigdemont demandèt al govèrn de Rajoy e als que sostenon l’aplicacion de l’article 155, se respectaràn lo resultat d’aquel vòte. “Vòli un engatjament clar, pr’amor que s'accèptan pas una victòria del blòc independentista i aurà d'electors de doas classas. Sètz dispausats a respectar lo resultat, quin que siá? Lo govèrn e lo pòble catalan, òc”, çò diguèt.
 
Puigdemont faguèt sa compareissença al centre internacional de premsa Brussels Club, davant aperaquí 150 jornalistas de mai d’un centenat de mèdias internacionals, çò rapòrta VilaWeb.
 
 
Far abans dins lo pacifisme coma sola arma
 
Puigdemont demandèt al pòble de Catalonha de se preparar per un camin long basat sus l'unitat e “l'intelligéncia collectiva que nos a permés d’avançar dins lo pacifisme coma sola arma”. Tanben demandèt la “reconeissença dels conselhièrs qu’an ja pres comjat de lors familhas e enfants, segurs que pòdon finir en preson”, e faguèt una crida internacionala per que, sustot, l'Union Europèa reagiguèsse: “de permetre al govèrn espanhòl que dialògue pas, qu'impause militarament, que nos embarre en preson pendent trenta ans, es metre fin a l'idèa d’Euròpa e es una error que pagarem fòrça car totes los europèus”.
 
 
L’agressivitat de l’estat espanhòl
 
Tanben expliquèt l’accion de son govèrn après la proclamacion de l’independéncia divendres passat. Dins aquel sens, diguèt qu'avián mesestimat la possibilitat d’afrontar la presa de contraròtle pel govèrn espanhòl, sostenguda pel Partit Popular, lo Partit Socialista e Ciutadans.
 
“L’agressivitat de l’estat nos obligava d’adaptar lo plan de trabalh a aquelas circonstàncias e priorizar per dessús tot d'evitar la violéncia”, çò diguèt en tot destacar que voliá pas metre los foncionaris dins una situacion malaisida. “Aqueste govèrn auriá pogut forçar los foncionaris fidèls a començar una batalha frontala per l’egemonia, o auriá pogut emplegar la partida de la polícia fidèla a la Republica per defendre l'independéncia, mas ai preferit de garentir que i aurà pas d'afrontaments, que i aurà pas de violéncia. Espanha nos pòt pas menar devèrs un scenari de violéncia”.
 
E mai, revelèt qu’el aviá de “donadas de sorsas entièrament verificablas, qu’indican que lo govèrn espanhòl preparava una ofensiva extrèmament agressiva e sens precedents contra lo pòble de Catalonha”.
 
Aquela agressivitat la confirmèt abans ièr la procedura presentada pel ministèri public contra totes los membres del govèrn e lo burèu del Parlament, acusats de rebellion e sedicion. Riscan de penas de fins a 30 ans de preson.
 
Se tot aquò “a lo prètz d’alentir la mesa en òbra de la Republica, cal considerar qu’es un prètz rasonable dins l’Euròpa del sègle XXI". Ansin apondèt qu’aquò “es un acte de coeréncia que demòstra que la Republica Catalana serà un estat diferent”.
 
 
Las linhas d’accion del govèrn de Catalonha
 
Dins sa conferéncia de premsa, Puigdemont presentèt las quatre linhas d’accion principalas de son govèrn que son:
   
 
“Soi pas aicí per demandar l’asil politic”
 
Puigdemont precisèt qu’èra pas anat a Brussèlas per demandar l’asil politic. “Soi aicí per agir amb libertat. Soi vengut a Brussèlas pr’amor que s’agís d’un afar europèu”, çò diguèt en tot apondre qu’aquí el podiá trabalhar e s’exprimir amb tranquillitat, se prenèm en compte que l’estat espanhòl a ordenat de li levar sa seguretat personala e que lo ministèri public lo perseguís per “rebellion” e “sedicion”, amb lo risc de 30 ans de preson.


Dura reaccion de la justícia espanhòla
 
Qualques oras après la conferéncia de premsa de Puigdemont e d’una partida de son govèrn, L’Audiéncia Nacionala espanhòla, un tribunal d’excepcion, convoquèt a Madrid davant los jutges Carles Puigdemont e tot son govèrn, dijòus e divendres que venon. Son acusats de presumits delictes de sedicion, rebellion e malversacion de fonzes publics.

En mai d’aquò, la justícia lor demanda una caucion de 6 207 450 èuros que devon liurar abans tres jorns; si que non, lor sasiràn los bens.