Divendres 12 d’octòbre se debaneron a Limòtges las assisas territorialas sus l’ensenhament superior e la recercha. L’ideia d’un establiment unenc per la region ne’n surtiguet.
Començada en julhet per una consultacion nacionala, las assisas de l’ensenhament superior e de la recercha se debaneron divendres passat dins la capitala lemosina. Amasseron daus universitaris, daus estudiants, daus entrepreneires mai las aurotitats politicas localas a l’entorn de “la reüssita de tots los estudiants”, “una novela ambicion per la recercha” e “un paisatge noveu per l’ensenhament superior e la recercha”.
L’ideia principala que ne’n surtiguet es de crear un establiment unenc per la region. Quò serà l’essenciau de la contribucion lemosina per la sintesi au niveu nacionau dau 26 e 27 novembre a París. “Si los actors son de consent, quò pòt’nar fòrça regde”, çò disset Jean-Paul Denanot, lo president dau conselh regionau. Prepausa de començar per l’agropament de las tres escòlas d’engenhaires dau Lemosin en far benleu, un sistema de recrutament daus estudiants comun.
Per Jacques Reiller, prefecte de region, que vòu veire la meitat d’una classa d’atge titulara d’un diplòma de l’ensenhament superior, lo Lemosin es de la bona talha per las experimentacions.
La region podriá renforçar son oferta de formacion per los liceans. “Auei, n’i a pas de reflexion globala sus l’oferta de l’ensenhament superior” ço disset Hélène Pauliat, presidenta de l’Universitat de Limòtges. “Avem pas d’estructura coordonada sus las formacions.” La lei de descentralizacion venenta deuriá balhar au conselh regionau quela coordinacion.
Jean-Paul Denanot l’i vei un mejan per “metre en plaça la chadena orientacion-formacion-emplec.” Per Michel Cogné, raportaire de las assisas e professor a l’Universitat de Limòtges, “la reüssita de l’insercion passa per l’adeqüacion de la formacion emb lo monde economic”.
Maime Caillon
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
#2 Tot parièr a l'Universitat de Clarmont onte l'Occitan èra una opcion e a disparegut. E pr'aquò une filièira de formacion es vitala, qu'es impossible de durbir una Calandreta o una escòla publica bilingua, quitament se per astre l'oportunitat se presenta, per abséncia totala de personal format. Cossí faire ? Un master d'estudis nòrd-occitans dins un departament d'estudis romans ? O una antena del CFPO ?
Fau saubre que l'occitan a l'universitat de Limòtges era nonmàs una opcion. Era. Perque per de las rasons budgetàrias se farà pus a partir de quela rentrada. Quò srià 'na batalha de las belas de bastir una filiera de formacion quitament p'ita.
La cadena orientacion-formacion-emplec, se se concretiza, serà una oportunitat de sasir per los Occitanistas dins las regions Nòrd-Occitanas. Cal capitar de fargar al mens un pòli de formacion en lenga e cultura occitana dins cada region. Me sembla que bastir una filièira de formacion -quitament pichona- es mai prioritari que de defendre l'Occitan e los mejans de son plan magre ensenhament d'un biais exclusivament defensiu, coma se fa estiralament a l'ora d'ara. Messatge al nòstre Gustau Aliròl.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari