Despuish lo començament de l’espleitacion deu gas a Lac (Enter Dus Gaves) —que comencè sheishanta ans i a en 1957—, las polemicas pertocant la polucion que’s multipliquèn. En 2002, un estudi qu’amuishè que, mei e s’apressavan de Lac , mei la subermortalitat devuda a la pollucion quimica que pujava. Que caló 14 ans tà que vadosse public l’an passat . Despuish 3 ans, dab l’arribada de l’usina Induslac, los arriberans que son victimas de las pollucions, mes tanben mei que mei de trebucs de santat, devuts aus regets industriaus d’aquera usina.
 
Divés passat, un centenat de manifestants que s’amassèn a Lac, tà denonciar aquera situacion. Qu’avèn responut a l’aperet de duas associacions, l’ARSIL, associacion deus arriberans de l’ola de Lac, e de la  Sépanso 64 , ua associacion ecologista.
 
A la Sepanso, lo combat qu’ei doble: suu terrenh mes tanben en justicia, dab un sol objectiu: obtiéner ua economia eficaça qui sia arrespectuosa de l’environament.
 
Cathy Soublès, de la Sépanso 64 qu’èra au micro d’Yves Pédegert.

On e n’èm uei lo dia dab las pollucions de Lac?
 
N’avança pas pro viste! Qu’avem ensajat de las denonciar au près deus industriaus e de l’administracion, mes las causas que cambian chic...Totun, lo vesiar que n’an hartèra! Los de Lac mes tanben los qui son a l’entorn, dinc a Pau. Personas qui testimònian deu lor ressentit fisiologic. E donc adara que n’avem pro d’ensajar de discutir. Ne podem pas deishar har las causas atau...
 
 
Que hè tres ans que se n’i parla e n’i a pas gran causa qui avança, alavetz que cau har?
 
Qu’avem portat lo clam en 2015, lo dossièr qu’estó hornit l’an passat d’elements navèths. Qu’esperam que quauquarren e va sortir de tot aquò. Après, que vam tornar pensar a çò que podem har en mei tà que las causas e poscan cambiar.
 
 
Dab un sostien politic?
 
A còps, los elegits que disen qu’èm tostemps contra l’emplec, n’ei pas vertat! Que pensam que podem tribalhar d’ua auta faiçon, en tot arrespectar la natura, l’environament e los òmis. Aquò qu’ei possible, que cau sonque quauque moneda, e qu’ei lo còr deu problèma: que las cau pagar, las installacions sanas qui ne miaçan pas la santat deu monde...
 
 
 
 
Yves Pedegert