L’Audiéncia Nacionala espanhòla, un tribunal d’excepcion, mandèt aqueste dijòus en preson ferma totes los conselhièrs del govèrn legitim de Catalonha —elegits per las urnas e destituits pel govèrn espanhòl— levats los que son en Belgica Atal, la lista de presonièrs politics compren lo vicepresident Oriol Junqueras e los conselhièrs Raül Romeva, Jordi Turull, Dolors Bassa, Carles Mundó e Meritxell Borràs. Son acusats de presumits delictes de sedicion, rebellion e malversacion de fonzes publics. En mai d’aquò, la justícia lor demanda una caucion de 6 207 450 èuros que devon liurar abans tres jorns; si que non, lor sasiràn los bens. Los an encarcerats dins divèrsas presons a l’entorn de Madrid.
 
Quants als membres independentistas del burèu del Parlament de Catalonha, dont la presidenta Carme Forcadell, anèron tanben ièr davant los jutges a la Cort Suprèma. Mas aquel tribunal lor a concedit un relambi d’una setmana per poder alestir lor defensa. Pasmens, los jutges an ordenat que sián susvelhats per la polícia.
 
Après lo precedent dels presidents de las associacions independentistas, Jordi Cuixart e Jordi Sànchez, que son encarcerats dempuèi lo 16 d’octòbre, totes riscan de penas de 30 ans de preson.
 
 
Mandat d’arrèst internacional contra Puigdemont
 
En mai d’aquò, la jutgessa a acceptat la demanda del ministèri public e a emés un mandat d’arrèst internacional pel president Carles Puigdemont e los quatre conselhièrs que son govèrn que son amb el a Brussèlas. Se tracta de Toni Comín, Meritxell Serret, Clara Ponsatí e Lluís Puig.
 
 
Barcelona reconeis lo govèrn de Puigdemont coma legitim
 
Mentre que la justícia espanhòla jutjava los ministres de Catalonha, la comuna de Barcelona a aprovat una mocion que reconeis l’executiu de Puigdemont coma sol govèrn legitim.
 
 
Mobilizacions
 
Mentretant en Catalonha, las mobilizacions comencèron ja de matin, en supòrt als elegits jutjats. Los acamps de protèsta contra los empresonaments son mai nombroses que jamai.
 
Las associacions independentistas apelan a mostrar de “sosten civic e pacific” als elegits perseguits per la justícia espanhòla.

Reaccion de Puigdemont
 
Quant a el, lo president Carles Puigdemont, enregistrèt un messatge vidèo e lo mandèt sul pic a TV3. “Es pas pus un afar intèrn. Es necite que la comunautat internacionala, e mai que mai l’europèa, s’avisen del perilh que representan aquelas actituds”, çò afirmèt Puigdemont en demandant l’intervencion d’Euròpa.
 
“D’encarcerar un govèrn per aver complit sos engatjaments electorals es mancar a l’estat de drech”, çò diguèt Puigdemont en tot avertir que las futuras accions del govèrn espanhòl pòdon èsser duras: “Nos espèra una repression longa e ferogtja. Podèm pas defalhir, e mai o devèm combatre del biais qu’o fasèm los catalans: sens violéncia, en patz e amb respècte per totas las personas e totas las opinions”.
 
Enfin, clavèt son discors en assolidant que “darrièr los barròts, lo govèrn legitim de Catalonha es infinidament pus digne que lors illusits empresonaires”.


Reaccion del sindic d'Aran