Actualitats
Uèi comença la campanha de micromecenatge d’auton per Jornalet
L'associacion Los Amics de Jornalet a decidit d'ensajar un nòu modèl de finançament. A cada sason, siá 4 còps per an, bandirem una campanha de micromecenatge
Dempuèi sa creacion Jornalet patís una manca cronica de mejans financièrs. Es un tèma qu'avèm sovent discutit, tant dins lo quite Jornalet coma dins los rets socials. De far foncionar un jornal electronic cada jorn exigís un trabalh dels grands al nivèl de la velha informativa, de la redaccion, de la revision lingüistica, de l'animacion de la còla, de la mesa en linha. Aquesta aventura jornalistica liura, independenta e occitana demanda a sos mestierals una granda abnegacion en nom d'aquesta causa. Lo problèma es que l'abnegacion noirís pas, e decentament non se pòt pas demandar a degun de trabalhar dins lo jornalisme sens èsser pagat. Lo benevolat a de limits que son rapidament atenches. E parlarem pas dels còstes de mantenença e de desvolopament del sistèma informatic.
L'associacion Los Amics de Jornalet, de drech francés, foguèt creada amb la tòca de recampar los dons -essencialament en provenença de l'estat francés- e de los mandar a Barcelona, sèti de la redaccion de Jornalet. Es una mena de boita postala de transferiments de fonzes. Los dons que recebèm cada an son de mai o mens 2000 èuros qu'enviam integralament a l'ADÒC, supòrt juridic de Jornalet a Barcelona.
L'associacion Los Amics de Jornalet a ensajat de demandar de subvencions publicas a totas las collectivitats terriotorialas d'Occitània (conselhs departamentals e conselhs regionals). Nada nos volguèt pas ajudar. Recebèrem sonque de letras de refús, de part de las collectivitats qu'aguèron la cortesiá de nos respondre.
Tre lo moment de sa creacion, l'ÒPLO tanben foguèt sollicitat per una ajuda financièra perenna. De senhals orals encoratjants son venguts d'aquel organisme mas per ara res de concret n'es pas sortit. Los meses passan e lo finançament de Jornalet se fa cada còp mai dificil.
L'associacion Los amics de Jornalet a decidit d'ensajar un nòu modèl de finançament. A cada sason, siá 4 còps per an, bandirem una campanha de micromecenatge. La que lançam uèi durarà fins al 12 de decembre. Per aquesta primièra, avèm causit un objectiu simbolic de 1000 èuros, que nos sembla de bon aténher.
Al fil dels ans avèm aprés qu'en matèria de jornalisme occitan podèm pas comptar que sus nosautres, sus nòstras fòrças e... sus nòstra moneda. Los micromecenatges son una forma justa e ciutadana de finançament que cadun i pòt portar çò que vòl o pòt segon sos mejans. Son tanben d'una utilizacion facila -ja que tot se passa per Internet- e securizada: Ululé es un sit francés de micromecenatges reconegut e seriós.
L'aventura de Jornalet se deu perseguir, afortir e desvolopar. Cadun i ten un ròtle important a jogar.
Endavant!
Gerard Joan Barceló,
president dels Amics de Jornalet
Anatz sus: https://fr.ulule.com/jornalet/
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Exemple de Politis, periodic setmanièr, amb sa campanha de collecta de dons, via Presse e pluralisme.
P&P es una bòstia de letras que reversa la collecta a cada jornal indicat per le balhaire.
Díson, amb un don de 100 eur, pagaretz pas que 34 eur, e desdusiretz 66 eur.
Aquela associacion es limit, tant quant finança entrepresas de premsa comercialas, mès es coberta per l'Estat.
En França, tota associacion que complís amb les criteris fiscals, o pòt far, mès per prevenir tot problèma, val mai n'obtèner la reconeisséncia prévia amb la procedura de "rescrit".
Le finançament d'un jornal non-comercial es completament conforma.
Me sembla que Jornalet deuriá ésser una associacion filiala comuna d'ambedoas associacions existentas, amb mesa en comun de mejans e de fonzes, en razon de la difusion de cada costat de la frontièra.
Amb aquel montatge, Jornalet seriá pas nacionalament limitat, en matéria de dons e mai de subvencions.
Cal tanben una gestion rigorosa, contabilitat, registre de socis, amassadas...
La melhor dals dons es aquel que se fai dirècte : dau bailaire au reçaveire.
La melhora de las bancas es aquela que se practica sans enterès entre doas personas de plena fisança : entre se. Es ce que fau ieu... e despièi d'annadas. Ai pas jamai agut quauque problèma.
Solament, per lo prèst, chau bien causir son monde, èstre segur-segur d'a quau volètz prestar. Après, fai tirar ! De qué volètz vos embestiar la vida emb d'entermediaris, francament ? Per lo prèst, savèm que dedinc certanas comunautats fonciónon coma aquò. Mès se lo don particularament pòt permetre d'èstre parcialament franc de talha, perdequé pas reconéisser lo don, dau moment que nos evitem los entermediaris...
#6
Se pòt mandar un chèc als Amics de Jornalet. Es çò que fau.
Associacion bòstia postala de transferiments de fonzes decap Espanha
Sembla logic que le montatge sia pas eligible a subvencions publicas...
A perpensar...
Podèm participar sens passar pel site de ulule ? Coma dich, es cagant que se prenon una comission al passatge.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari