De milièrs de personas manifestèron dissabte a Perpinhan (Catalonha) dins l’encastre del Jorn Nacional de Catalonha Nòrd. Organizada per las divèrsas associacions culturalas e partits politics, la marcha ongan se debanava jol lèma “Sèm Catalonha Nòrd, volèm decidir”. Lo Jorn de Catalonha Nòrd revendica d’escafar lo Tractat dels Pirenèus, e clava cada an la corsa per la lenga catalana apelada “Correllengua”, qu’a luòc long de totes los Païses Catalans.
 
La participacion d’ongan es estada fòrça mai nombrosa que dins las annadas precedentas. Los manifestants cridavan “Ni França, ni Espanha, Païses Catalans”, e “Volèm decidir”, mas la revendicacion pus presenta sus las afichas e dins los crits èra per la liberacion dels presonièrs politics catalans, dont los presidents de las associacions independentistas e mai de mièg govèrn legitim de la Generalitat de Catalonha, embarrats dins mai d’una preson de Madrid amb las acusacions de “rebellion” e “sedicion”.
 
La protèsta finiguèt al celèbre “Castellet” de la vila catalana amb de concèrts e parladisses. Puèi la Casa Musical aculhiguèt d’autres concèrts per clavar una jornada revendicativa e festiva a l’encòp.
 
Lo Jorn de Catalonha Nòrd se commemòra lo 7 de novembre, mas la manifestacion se desplaça de qualques jorns dins una dimenjada car dins l’estat francés la data es pas un jorn feriat. Se remembra lo Tractat dels Pirenèus, signat per las monarquias francesa e espanhòla en 1659, que simboliza la particion de Catalonha, la pèrda de las institucions pròprias en Catalonha Nòrd, lo començament de la descatalanizacion sistematica del país e la resisténcia de l’identitat catalana als divèrses regims franceses.