Los salariats deu Centre de Formacion Professionau Occitan Mieidia-Pirenèus que son en cauma despuish lo 2 d’octobre. Qu’arcastan au navèth burèu de l’estructura, elegit au mes de junh passat, la mesa en plaça de practicas que disen “arcaïcas”. Çò que possè los salariats a reagir estó la convocacion que recebón a la fin de seteme per un entertien prèvi a sancions disciplinàrias “que pòden anar fins al licenciament” segon eths. Despuish, un hialat de sostien a la còla que s’ei format, las seradas de sostien que’s multiplican (debats sus las perspectivas de l’emplec en occitan, bal occitan, talhèr alternatiu d’occitan, etc.) e ua canhòta en linha qu’estó obèrta tà sostiéner l’equipa dens la soa luta.
 
Deu son costat, lo burèu deu CFPO-MP que’ns hidè la fragilitat de l’estructura en “plan d’arredreçament judiciari” despuish un an e miei: “S’acceptam de’ns presentar ath burèu qu’ei pr’amor que sabem plan qu’eth movement occitan manca de monde formats ara lenga, e que non volèm pas deishar càger ua estructura qui hè tant de besonh.”
 
Que soslinha lo refús deus salariats tau dialòg despuish l’eleccion deu navèth burèu e d’arrefusar encontres individuaus, perpausats purmèr lo 31 d’agost, puish a la rentrada: “Lo 31 d’agost, alara que cadun aviá confirmat que vendriá a l’ora prepausada, refusèron collectivament aqueles rescontres, en dire qu’èran pas confòrmas al drech del trabalh, e en exigent que los recebèssem en grop. Aceptèrem pas aquela injonccion d’acamp collectiu, qu’èra un dialòg seren amb cadun d’eles que nos fasiá mestièr. Lo còde del trabalh enebís pas de cap de biais a un emplegaire de rescontrar sos salariats individualament. A mai al contrari, es una necessitat dins la vida d’una entrepresa de se parlar! Lo refús d’un salariat de participar a un escambi amb son emplegaire es una marca de reget del ligam de subordinacion que lo liga a son emplegaire.”
 
Lo navèth burèu que contraditz las afirmacions avançadas peus salariats com lo hèit que n’i aja jamei nada demanda de revalorizacion de salaris o de cambiament de materiau informatic de part deus salariats. Lo mòde de gestion qu’estó tanben criticat peus salariats, a qué lo burèu respon: “Es pas de bon ausir per un burèu en plaça dempuèi dos meses, d’aitan mai quand los salariats refusan de comunicar”. Lo burèu que fustiga l’arcast qui’u ei hèit d’espurgar lo personau quan “n’a pas licenciat arrés”.
 
Los membres deu burèu ne’s senteishen pas arrespectats peu tribalh que balhan com associatius benevòls, e que declaran que’u hasèvan dòu de véder ua atruna com lo CFPO-MP, màger per la vitalitat de la lenga occitana, “s’arroïnar atal”.
 
 
Delà ger, lo burèu deu CFPÒ-MP qu’encontrè aus salariats caumaires arron un mes de cauma, e l’encontre ne’s debanè pas com esperat. Los salariats ne s’estiman pas escotats, “aprèp aver negat lo drech sindical dins l’entrepresa en refusant la preséncia de nòstre representant sindical a la taula, negat nòstras revendicacions tre la debuta de las discussions, pasmens transmesas pels caumaires dempuèi lo 2 d’octòbre, nos an ofèrt l’espectacle desolant d’un patronat desuet e sens projècte. Uèi, actam formalament que desiran pas res d’autre que de daissar poirir la situacion e metre en perilh nòstres emplecs”.
 



La Setmana
 

---

Article publicat dins La Setmana lo 1r de novembre passat