Uèi fa 100 ans de la dicha Revolucion d'Octòbre, apelada atal car Russia seguissiá alara lo calendièr julian. Lo 7 de novembre de 1917 a l'entorn de 21h30, lo Partit Bolshevic prenguèt lo Palai d'Ivèrn de Sant Petersborg en metent fin al govèrn del tsar. L'endeman Vladimir Ilich Ulianov, escaisnommat Lenin, venguèt lo cap del nòu estat socialista que vendriá l'Union de Republicas Socialistas Sovieticas (URSS).
 
Amb aquela revolucion naissiá lo primièr estat socialista del Mond, al sens marxista, que vendriá una confederacion. La primièra proposicion de Lenin èra de crear una union de republicas socialistas de tot lo Mond, dobèrta a quin endrech que volguèsse declarar lo passatge al comunisme. Los primièrs païses que jonguèron l'union foguèron Russia, Ucraïna, Bielorussia, e Transcaucàsia (qu'après se desseparariá en Armenia, Georgia e Azerbaitjan). Fins a l'an 1956 s’uniguèron a l'URSS plusors republicas, qualques unas de bon grat e d'autras pas gaire. Abans sa fin, lo 25 de decembre de 1991, l'URSS comprenguèt quinze republicas.
 
Pasmens, l'URSS renoncièt lèu a integrar totas las republicas comunistas qu'apareissián al Mond. E n'espeliguèron divèrsas, amb diferentas linhas de pensada, coma foguèt lo cas del maoïsme de China. A l'ora d'aran, la Corèa del Nòrd, Cuba, Laos, Vietnam e China son d'estats oficialament comunistas, e mai la realitat administrativa d'aqueles païses corresponda pas gaire a la pensada socialista.
 
Dins lo passat, tota l'Euròpa de l'èst foguèt oficialament comunista, compresa la part orientala d'Alemanha, e un nombre important de païses africans e asiatics. Dins los ans 1970 e 1980, i aguèt lo moment de tension maximala e d'antagonisme entre los blòcs apelats comunista e capitalista, la dicha Guèrra Freja.
 
 
Una alternativa sociala al capitalisme
 
Lo comunisme es un sistèma de gestion politica e economica alternatiu al capitalisme, inspirat mai que mai de la pensada de Karl Marx. Prepausa una societat ont la proprietat dels mejans de produccion siá a las mans del pòble, per superar las inegalitats socialas creadas pel capitalisme. En practica, los regims comunistas an instaurat un sistèma economic basat sus la proprietat estatala dels mejans de produccion, amb una economia centralizada pauc eficaça e que crèa una enòrma burocracia estatala.
 
Del ponch de vista politic, s'instaura la "dictatura del proletariat" qu’en practica la corrompèt la presa del contraròtele de l’estat pel partit comunista.
 
 
Un modèl de lucha
 
E mai se dins la majoritat de cases, los païses oficialament comunistas, venguèron de dictaturas que rebutavan lo pluralisme e la democracia, lo comunisme, dins los païses capitalistas, es un dels movements que luchan mai pels dreches civils, socials, democratics e economics.
 
Dins aquel sens, mentre qu'existissiá l'URSS, plusors païses capitalistas avièron de politicas de proteccion sociala e lo dich "estat del ben-èsser" amb la tòca d'evitar que se desvolopèsse un procès comunista revolucionari.
 
Qualques païses capitalistas an agut, e an, de partits comunistas amb una influéncia fòrta. Tanben en cò nòstre.
 
Mas après la casuda del mur de Berlin e la fin dels regims diches comunistas, lo capitalisme comencèt de desactivar aquelas politicas de "ben-èsser" e d’impausar de reduccions budgetàrias tanben dins las politicas socialas.
 
Uèi lo jorn, lo comunisme, e mai se critica las errors de l'URSS e d'autres païses, contunha de far partida de biais fòrça important de la lucha anticapitalista, amb l'anarquisme e d'autres movements d'esquèrra revolucionària.
 
En Russia, ont tot comencèt amb la Revolucion d’Octòbre, lo Partit Comunista es ara lo segond partit pus grand, après lo partit de Vladímir Putin, Russia Unida. Pasmens, sa representacion politica es minimala e ten solament 2 goverors suls 85 del país, e 42 deputats suls 450 de la Duma, la cambra bassa del parlament.