Mai de dos cent cònsols màgers de Catalonha anèron ièr dimarts a Brussèlas per sosténer lo president Puigdemont e sos ministres en exili, e sustot, per denonciar l’empresonament de la rèsta del govèrn catalan e dels presidents de las associacions independentistas.
 
Amb aquel viatge, d’anar-tornar durant la meteissa jornada, los cònsols catalans demandan l’engatjament e l’intervencion d’Euròpa davant una situacion de “violéncia policièra, judiciària e politica contra los partisans de l’independéncia de Catalonha”.
 
A 17h faguèron un acte al Centre Cultural Bozar, amb l’intervencion de qualques cònsols màgers e d’eurodeputats catalans.
 
I aviá unes 700 cònsols màgers que se volián gandir a Brussèlas, mas fin finala, l’associacion de municipalitats a obtengut sonque de plaças per i menar 200 representants. Lo Principat de Catalonha e Aran es compausat de 948 comunas.
 
 
712 cònsols menats en justícia
 
De remembrar que 700 cònsols catalans e 2 cònsols araneses (lo de Les, Emílio Medan, e lo de Vilamòs, Jose Castet), son percaçats per la justícia espanhòla per aver sostengut lo referendum d’independéncia de Catalonha e Aran, que se tenguèt lo 1r d’octòbre passat, jols còps de matraca que los policièrs espanhòls portèron als ciutadans que volián votar.

 

 

---

TV3: Dos-cents alcaldes es desplacen a Brusel·les per donar suport al govern


 
 
 #mayorsforfreedom tuits