Antoine Sollacaro, un dels avocats mai brilhants de Corsega, pròche dels militants corsistas, foguèt assassinat amb arma de fuòc dimars passat a Aiacciu (Corsega). Sollacaro aviá assegurat la defensa d’Yvan Colonna, condemnat a perpetuitat en junh per l’assassinat del prefècte Erignac.
Segon d’informacions de l’AFP, Antoine Sollacaro, un dels avocats mai coneguts e un defensor de militants còrses coma Alain Orsoni e Yvan Colonna, foguèt tuat per balas dimars passat. Amb Sollacaro, son ja 15 los omicidis d’ongan en Corsega, ont las autoritats denóncian “una escalada criminala”.
Sollacaro, dins sos 63 ans, foguèt fusilhat dimars passat a 9h05 quand se trovaba près de la siá automobila, en una estacion de servici del centre d’Aiacciu.
Segon las primièras constatacions, l’avocat foguèt victima de “nòu tirs, dont sièis al cap, al torax e al braç”, çò indiquèt lo procuraire d’Aiacciu, Xavier Bonhomme. L’assassin anava cobèrt amb un casco sus una mòto menada per un complice.
Bonhomme soslinhèt dimars de ser que cap de pista èra pas privilegiada, en aquel estat, pels enquestaires. “Los elements en nòstra possession permeton pas de determinar las rasons qu’an empench d’individús a cometre aquel acte qu’entrebolís de manièra excepcionala l’òrdre public”, çò declarèt.
Pasmens, los enquestaires estúdian sustot un ligam eventual amb una question de fraudariá dins los mercats publics, implicant una societat de seguretat, l’SMS, que divèrses fondadors sieus foguèron tanben assassinats, coma Antoine Nivaggioni e Yves Manunta, defenduts per Sollacaro.
Sollacaro èra un dels mai brilhants penalistas de l’illa. Èra paire de dos enfants: un filh qu’es avocat a Niça e una filha que deu passar aquesta setmana los examens per venir tanplan avocata. La victima aviá exercit la foncion de bastonièr d’Aiacciu en 1998 e 1999.
L’assassinat a provocat l’estomagada en Corsega. S’agís del primièr avocat assassinat dempuèi la mòrt de Jean Grimaldi, assassinat tanben per balas lo 6 de novembre de 1991 a Bastia.
L’endeman de l’assassinat, lo primièr ministre francés, Jean-Marc Ayrault, anoncièt que lo govèrn elaborarà una directiva de politica penala especifica en Corsega per luchar contra la criminalitat.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Aprestava l'independéncia de l'Isla, aqueste òme ? O chaupinava dins un domani que i èra pas lo plan vengut ? E lo ministre francés d'anonciar que "una directiva de politica penala especifica en Corsega per luchar contra la criminalitat". Aquò vòl dire que davant la lei, los de Corsega e los del continent auràn pas pus lo meteis estatut ! M'estonariá plan que lor conselh CON-stitucional se n'estomaguèsse pas !
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari