Siria a anonciat que signarà l’acòrdi de París de 2015 sul cambiament climatic. O an dich sos representants pendent la conferéncia del COP23, que se debana a Bonn (Alemanha). Aquel fach daissarà los Estats Units coma lo sol país del Mond que refusa de participar a la lucha contra lo cambiament climatic. En junh passat, lo president estatsunidenc, Donald Trump, anoncièt que quitava l’acòrdi que l’aviá signat son predecessor, Barack Obama. Mas lo renonciament pòt pas èsser efectiu abans lo 4 de novembre de 2020.
 
A Bonn i a una delegacion de centenats de cònsols e ambaissadors, de presidents d’universitats e d’òmes d’afars per assabentar qu’al nivèl local e entrepresarial se contunha de prene d’accions per ensajar de contrarotlar los efièches de l’aument de temperatura.
 
Qualques comentators an soslinhat lo fach que, quitament Corèa del Nòrd, un regim que recep tantas criticas e que los Estats Units considèran coma un enemic perilhós, a signat l’acòrdi. Tanben Nicaragua, qu’aviá refusat l’acòrdi, a anonciat que lo signarà, e mai se l’oposicion d’ailà jutja que los engatjaments declarats son pas pro fermes ni ambicioses.