Yvonne Griley, directritz generala de la Politica Lingüistica del Departament de la Cultura, a la Generalitat de Catalonha, es estada causida per unanimitat coma vicepresidenta del Ret Europèu per la Promocion de la Diversitat Lingüistica (NPLD segon sas siglas en anglés): i representarà la Generalitat de Catalonha.

S’agís del primièr còp qu’un representant catalan a una carga dins aquel ret. La designacion se produsiguèt lo 4 d’octòbre passat pendent la celebracion de l’assemblada generala de l’NPDL a Corti (Corsega). La presidéncia de l’NPLD, es  Jannewietske de Vries que l’exercirà en aquel nòu mandat; es lo representant del Govèrn Regional de Frisa.
 
Griley remarquèt que “d’aquela faiçon, la Generalitat referma son engatjament per la defensa de la pluralitat lingüistica europèa e l’adeqüata reconeissença que cal de la part de las institucions europèas”; e mai soslinhèt que “Catalonha a totjorn volgut aportar a Euròpa las valors del respècte e la defensa de la diversitat, e ara o podèm far amb mai d’intensitat dempuèi la vicepresidéncia de l’NPLD”.
 
L’NPLD se creèt en 2007 amb la tòca d’influir sus las politicas lingüisticas de l’Union Europèa, tocant la reconeissença de las lengas regionalas e minorizadas e la gestion de la diversitat lingüistica dins l’encastre d’Euròpa. Catalonha i aderiguèt coma membre de plen drech en 2009.
 
Lo ret compta amb la participacion de qualques govèrns estatals de l’Union Europèa, de govèrns autonòms, d’associacions e d’entitats culturalas que trabalhan en la promocion de la pluralitat lingüistica, d’universitats e de centres de recèrca. A l’ora d’ara, i son representadas 16 lengas europèas: occitan, catalan, escocés, irlandés, basco, galèc, cornic, breton, frison, galés, estonian, finés, suedés, lituan, còrs e lapon.