La deputada aranesa e occitanista del Parlament de Catalonha, Mireia Boya, a dich que sa formacion politica, la CUP, foguèt avertida que los podián acusar d’un ipotetic atemptat terrorista en Catalonha: “Mos podien acusar de bèth atemptat damb mòrts en carrèr”, çò assolidèt diluns passat dins una entrevista a Catalonha Ràdio. “Mos diguèren que podie èster violéncia de faussa bandièra restacada ath movement independentista e mès que mès ara esquèrra independentista”, çò precisèt.
 
En mai d’aquò, Boya considerèt veraias las declaracions qu’avián fachas la setmana passada Marta Rovira, d’Esquèrra Republicana de Catalonha (ÈRC) a la ràdio RAC-1. La secretària generala del partit independentista socialdemocrata aviá d’efièch assegurat que l’estat espanhòl aviá proferida la menaça de mòrts per carrièras se se proclamava l’independéncia. “Ac confirmam —çò diguèt Boya—, mos portèron tanben aquera inquietud”.
 
Boya se demandèt se la desmentida del govèrn espanhòl de las paraulas de Rovira èra un renonciament a la violéncia: “Abandonen es cargues policières e aqueres menaces? Non mos cau arrespóner a nosati, mès ath blòc constitucionalista: PP, PSC e Ciutadans”.