La Cort Penala Internacionala de l’èx-Iogoslavia condemnèt dimars passat a perpetuitat l’èx-general serbobosnian Ratko Mladić per genocidi, crimes de guèrra e crimes contra l'umanitat pendent la guèrra de Bòsnia, entre 1992 e 1995. Aqueles crimes comprenon los de persecucion, assassinat, chaple e deportacion. Lo considèran coma lo màger responsable del chaple de Srebrenica.
 
Mladić, cap militar dels sèrbes de Bòsnia e Ercegovina pendent la guèrra, es estat condemnat per èsser estat lo responsable de la chaple de Srebrenica en julhet de 1995. Aquela mortalha, ont moriguèron 8000 òmes e enfants bosnians musulmans, es considerada coma lo genocidi pus grèu d’Euròpa dempuèi la Segonda Guèrra Mondiala. Ratko Mladić es tanben acusat d’aver participat, en 1992, a una granda campanha de persecucions, deportacions, torturas e omicidis dins fòrça endreches de Bòsnia.
 
En mai d’aquò, la justícia l’a declarat colpable de crimes de guèrra e contra l'umanitat pel sètge de Sarajevo, ont defuntèron mai d’11 000 civils.
 
L’avocat de Mladić diguèt que l’òme a 74 ans e que sa santat es delicada. Pasmens, quand lo jutge prononciava sa senténcia, Mladić s’alcèt e renèt lo magistrat, que l’expulsèt de la sala.
 
Pendent la sesilha, lo jutge considerèt demostrat que Mladić aviá contribuit “significativament” a la tòca de son armada de maselar los bosnians musulmans, e tanben qu’èra estat tanben “contributiu” al moment de provocar la terror de la populacion civila de Sarajevo, assetjada per las fòrças serbobosnianas. D’efièch, lo jutge diguèt que l’acusat aviá blocada l’arribada de l’ajuda umanitària dins la vila, e qu’aviá dirigit de bombardaments e d'atacas mortalas contra los civils.
 
Lo jutge considerèt tanplan provat que las fòrças de Mladić aviá tuat “sistematicament” d’òmes e d’enfants a Srebrenica, e indiquèt que l’èx-comandant aviá fach mai d’una crida publica al “revenge” contra los musulmans bosnians. Pendent la sesilha, se constatèt d'abuses “brutals” contra los dreches umans de las victimas, amb “d’execucions massissas” e un tractament amb “gaire o brica de respècte per la vida umana o la dignitat”. Dins aquel sens, durant la lectura de la senténcia, lo jutge assegurèt que los crimes per los quals se condemna Mladić son los “mai crusèls” que i pòt aver.
 
Lo jutjament contra l’èx-cap de l’armada dels sèrbes en Bòsnia, qu'aviá fugit la justícia dempuèi la fin de la guèrra fins que foguèsse arrestat dins un petit vilatge de Serbia l’an 2011, s’es alongat de cinc ans, dempuèi lo mes de mai de 2012. La cort a fach testimoniar gaireben 600 personas e a analisat de milièrs de pròvas dels crimes comeses pendent lo conflicte en Bòsnia e Ercegovina, comprés lo genocidi d’Srebrenica e lo sètge de Sarajevo.
 
Lo jutjament contra Mladić l’a menat la Cort Penala Internacionala per l’Anciana Iogoslavia a l’Aia (Païses Basses), que s’encarga dels crimes de guèrra que se produguèron durant los conflictes dins l’anciana Iogoslavia, los ans 1990. Foguèt la primièr cort de justícia a entreprene lo jutjament dels delictes internacionals mai grèus dempuèi los procèsses de Nurembèrg e Tòquio après la Segonda Guèrra Mondiala.