Ua peticion qu’ei estada botada en linha delà ger per l’associacion NouTous, basada en las Lanas.
 
Que vòu entercalhar lo capdau de Baiona Difusion Premsa pr’amor de la non-distribucion deu jornau d’opinion Landemains dens lo son parçan de difusion.
 
La revista Landemains qu’existeish despuish lo començament de 2016. Tot prumèr a gratis e difusada locaument, qu’ei vaduda paganta augan, mei que mei entà poder estar distribuida en quiòsc en lo hialat public.
 
La revista qu’ei independenta e participativa. N’apartien pas a nat partit politic.
 
Dens aqueth encastre, tota constrenta, tota pression politica o economica qu’ei un empach a la libertat d’expression, com mençonat en l’article 11 de la Declaracion deus Drets de l’Òmi e deu Ciutadan.
 
Pr’amor deu sistèma botat per la Lei Bichet deu 2 d’abriu de 1947, la distribucion de premsa qu’ei un sector non concurrenciau qui guaranteish l’imparcialitat de la distribucion suu territòri francés. Cada enterpresa pertocada que deu har dab aquò shens nada discrimacion.
 
Totun, Baiona Difusion Premsa qu’arrefusa de distribuir Landemains en lo son sector (Mamisan, Morcens, Dacs, Sud-Lanas), contra l’etica de la lei e deus objectius deu dispositiu.
 
Los de Landemains que’s son avisats au près deus comerçants de las pressions, suspicions e interrogacions que lhèvan la non-distribucion de la revista per las vias oficiaus.
 
Que la podetz signar aquiu.
 
 
 
Joan-Nadau Commeres