Las eleccions regionalas al Parlament de Catalonha previstas pel 21 de decembre que ven son pas brica normalas. Pel primièr còp son pas convocadas pel president catalan mas pel cap del govèrn espanhòl, e se tendràn amb lo govèrn de la Generalitat destituit per l’estat espanhòl e amb sos membres en preson o en exili. E coma s'aquò sufiguèsse pas, lo Conselh Electoral espanhòl ven de far doas interdiccions: d’un latz enebís als mèdias catalans que nomenen “president” lo president Carles Puigdemont, e “conselhièrs” lo conselhièrs de la Generalitat en preson o en exili; de l’autre proïbís que se pòrte de ribans jaunes dins los burèus de vòte, simbòl que revendica la liberacion dels presonièrs politics, e obliga la comuna de Barcelona de traire la bandeiròla que pòrta la meteissa revendicacion.
 
 
Interdich de dire “president” e “conselhièrs”
 
En seguida d’una demanda del partit dich Ciutadans, lo Conselh Electoral espanhòl a enebit als mèdias de la Corporacion Catalana de Mejans Audiovisuals (CCMA), en particular TV3 e Catalonha Ràdio, l’usatge d’expressions coma “conselhièrs encarcerats” o “lista del president”, perque “mancan al principi de neutralitat informativa” e “pòdon crear de confusions”.
 
La resolucion del Conselh Electoral espanhòl apond que “i a pas d’exili aital ni mai de sospechada persecucion politica” mas que se tracta sonque d’“una aplicacion de la lei”.
 
Ça que la, los presidents del govèrn de la Generalitat pèrdon pas jamai lo títol de president. Aital tant los presidents en exercici coma los que o son pas pus, an totes lo títol de president e se deu parlar del president Pujol, del president Maragall, del president Montilla, del president Mas, del president Puigdemont, etc.
 
En mai d'aquò, Carles Puidemont a renonciat al salari que recebon los ancians presidents de la Generalitat, car se revendica totjorn coma lo president legitim de la Generalitat de Catalonha.
 
 
La rebellion de la color jauna
 
E en seguida d’una demanda del Partit Socialista (PSC), lo Conselh Electoral espanhòl a tanben proïbit que los membres dels burèus de vòte, los intervenents e lo mond que trabalharàn lo 21 de decembre a aquela eleccion, pòrten lo riban jaune, e a constrench la comuna de Barcelona de levar la bandeiròla que revendica la libertat dels presonièrs politics.
 
En mai d’aquò, Ciutadans a tanben demandat al Conselh Electoral espanhòl qu’enebisca la color jauna de las illuminacions de Nadal a Barcelona.
 
Aquò a fach de rambalh suls rets socials e a descadenat una avalanca de messatges ironics. Qualques usatgièrs an sollicitat per exemple l’eliminacion de la color jauna caracteristica dels taxis de Barcelona, lo cambiament del lògo de la CUP, la supression de la linha 4 del mètro barcelonés (de color jauna).
 
A mai, se prepausa de se vestir de jaune, de portar d’eissarpas jaunas e e de far servir d’autres accessòris d’aquela color per contestar l’interdiccion.