A Biscarròssa, lo Joan-Claudi Lacrotte, passionat deu hapchòt, de las carras e deu barrascatge, que s’i coneish tanben en arressegas e en arpans. A maugrat de las troncaderas (o tronçonaderas) e de las "tèstas d’abatatge" (caps d’abatedís), que guarda la nostalgia deu temps deus "Litches" e autes "Lionés", aqueths valents arressegaires de long chafrats atau percé, sovent, vienèn deu Massís "centrau". Autament dit de las montanhas, deu Lemosin o de l’Auvèrnhe. Per las gents, davant qu’estossin acostumats a las mapas de geografia e qu’inventèssin lo GPS, qu’èra deu costat de Lion.

 

L’arpan o "passapertot", qu’es mei fisic, solide, mei esportiu. La productivitat n’es pas la medisha mes, se gausan díser, que balha enqüèra mei de valor a la husta, au troncàs que sègan lentament e metodicament –a tu ! a jo! – dab lo bren d’arresec que’t tomba suus uelhs. Los traps, las palancas que còpas atau, que las considèras dab ua auta espiada que los tròç de bòi crompats au supermercat o en çò deu gròssiste qui’us a heit viener de non sei pas on. Deu còr de l’Africa? de las Americas? de Siberia?

 

Lo diluns 23 d’abriu (10h) los qui demòran a Biscarròssa o que s’i estancan per quauques jorns de vacanças, que van poder descobrir lo tribalh deus arresegaires e autes boscassèrs a la mòda vielha. Que serà deu costat de la plaja, mei exactament près deu parcatge de "Cugnes", on l’ONF a las soas installacions. L’associacion deus "Gascons de la Mar Grana" que va muishar e explicar au public l’activitat deus arresegaires qui utilizavan l’arpan entà har tombar los grans pins de la Montanha. Las maquinassas de uei que semblan ad aqueths dinosaures hartanèrs  deu temps de l’Èra secondària. Qu’engoleishen en dus o tres còps de caishaus los arbos los mei gròs. Que’us trociquejan en un eslambrec en har gisclar garbas de bren, en tot esglachar los praubes tausinòts torçuts, los freules sanguins o los pomèirs deu ledon (Arbutus unedo aperat "arbousier" en franchiman).

 

Per aquera demonstracion deu 23/04 a Biscarròssa-Plaja, los Gascons de la Mar Grana qu’instalaràn tanben ua "craba" entà har véder com segavan "de long" la husta entà har palancas, traps, piteraus e autas cerimanas.  L’istòria de la seuva (o ahorest) domaniau o usatgèra - ua curiositat d’aqueth parçan deu Bòrn - que serà tanben evocada.

 

 

 

J.J. Fénié