Lo conselh municipal de l’illa de Pascas a declarat la lenga rapanui oficiala del territòri. La tòca de la mesura es de ne refortir l’usatge demest los abitants e de la far practicar dins los servicis publics, çò rapòrta La Tercera.
 
L’oficialitat del rapanui arriba après un contestat debat menat pel cònsol màger, Pedro Edmunds Paoa, sus l’autonomia de l’illa.
 
Lo tèxt que declara l’oficialitat de la lenga se votèt en agost passat a l’unanimitat e precisa que “es completament necite de protegir la lenga rapanui e garentir son emplec public, mai que mai, protegir los dreches lingüistics de sos locutors e garentir d’èsser pas discriminat per parlar una lenga d’origina”.
 
En mai d’aquò, lo document precisa que la mesura seguís la demanda dels quites abitants de la zòna durant las sesilhas publicas que fa la municipalitat de l’illa. “La comunautat exprimiguèt sa volontat de regular cèrtas matèrias indispensablas per la proteccion de la cultura rapanui e per una melhora organizacion de la societat, e se considerèt prioritari de far una ordenança municipala qu’oficializariá la lenga”, çò expliquèt Edmunds Paoa.
 
Ansin, lo cònsol rapanui ajustava que “los catalans, per exemple, comencèron de refortir lor lenga e uèi son a un autre nivèl. D’oficializar la lenga rapanui va dins lo sens de cercar una autonomia mai granda, es una tièra de mesuras per que la comunautat rapanui parle la lenga”.

<br />
<br />
<a href="https://www.jornalet.com/socis" target="blank"><img alt="abonar los amics de Jornalet" id="Abonar los amics de Jornalet" src="https://www.jornalet.com/imatges/images/SOCI.jpg" /></a>