Actualitats
Era Val d’Aran e Barcelona s’engatgen entà qu’er occitan e sigue present en totes es activitats culturaus de Barcelona
Eth Conselh Generau d’Aran qu’a signat un acòrd damb er Ajuntament de Barcelona entà promòir en Barcelona era cultura e era lengua dera Val d’Aran
Ager, diuendres 19 d’octobre, eth còsso de Cultura, Coneishença, Creativitat e Innovacion der Ajuntament de Barcelona, Jaume Ciurana, e eth sindic d’Aran, Carlos Barrera, que signèren en Vielha (Val d’Aran) ua convencion de collaboracion entre er Ajuntament de Barcelona e eth Conselh Generau d’Aran. Er acòrd qu’a era tòca de promòir era preséncia dera lengua occitana e dera cultura aranesa en cap-lòc de Catalonha. En acte se presentèren es traduccions ar aranés des huelhes informatives d’activitats culturaus der Institut de Cultura de Barcelona.
Eth sindic d’Aran, Carlos Barrera e eth còsso de Cultura, Coneishença, Creativitat e Innovacion der Ajuntament de Barcelona, Jaume Ciurana que signèren ua convencion de collaboracion entara promocion dera cultura aranesa atau coma entara cooperacion en tèmes d’auviatge, musèus, archius e cultura populara e tradicionau.
S’agís d’un acòrd que met en evidéncia er interès der Ajuntament de Barcelona entà arreconéisher era lengua occitana, coma lengua pròpria e oficiau de Barcelona, en tot hèr-la presenta en totes es activitats culturaus dera ciutat.
“Per çò qu’ei dera Val d’Aran, as barcelonesi e as catalans les cau saber qu’en sòn país i a ua auta lengua qu’ei er aranés. Çò que volem qu’ei materializar qu’er aranés e ei ua lengua oficiau e volem anar mès tà delà e establir ua collaboracion que perdure en temps”, ce manifestèc Ciurana.
Deth sòn costat, eth sindic d’Aran, Carlos Barrera soslinhèc que “s’a daurit un nau tunèl entara Val d’Aran en çò que tanh ara nòsta istòria e realitat. Barcelona coma cap-lòc de Catalonha ei era ambaishadora ena rèsta deth mon e entara Val d’Aran accions coma aquera der Ajuntament de Barcelona mos ajuden entà difóner era nòsta identitat. Ei ua oportunitat impensabla e auem de contunhar trebalhant damb aguesta complicitat”.
Er Institut de Cultura de Barcelona qu’a ja editat en aranés es huelhes des següents musèus municipaus:
- MUHBA Musèu d’Istòria de Barcelona
- DHUB Musèus (Musèu Textil e der Abilhatge, Musèu des Arts Decoratius, Musèu de Ceramica)
- Musèu de Sciéncies Naturaus de Barcelona
- Musèu Frederic Marès
- Musèu Picasso
- Castèth de Montjuïc
- Bibliotèca Publica Arús
- Monastèri de Pedralbes
- Archiu Istoric dera Ciutat de Barcelona.
FM
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Es una ben polida cauva. Brau !
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari