Joan Francés Tisnèr es a crear un projècte màger per la cultura occitana de Gasconha. Entitolat Tralhaires, lo projècte es un espectacle suls passes de Fèlix Arnaudin, l’escrivan e fotograf gascon del sègle XIX, amb sas extraordinàrias e singularas aventuras del collectatge de las Lanas de Gasconha. Atal Tralhaires prepausa un concèrt multifonic inspirat d’aqueles collectatges, de la vida d’Arnaudin e evòca d’autras formas de rescontres, invitacions e confrontacions trenadas amb los païsatges d’endacòm, la lenga del país e son repertòri portat per d’autres passaires. La tòca finala serà un disc, un filme e un espectacle.
 
Per realizar aquel projectàs, s'es dobèrta una campanha de finançament participatiu sus la plataforma Zeste.
 
"Quan comencè de’s parlar de la mòstra fotografica (a basa de 300 de las 3000 placas presas per Arnaudin) "Le guetteur mélancolique" au Musèu d’Aquitània (mercés a la soa comissària Catherine Vigneron), que lo viengó a Joan Francés, l’idèa de realizar un espectacle qui’n seré per cèrts aspèctes un pendent sonòr. Arnaudin qu’empleguè un art tecnic de punta a la soa epòca, l’art fotografic, qui miè aus extrèms de çò possible e qui’u revela com un artista creator de prumèr plan e non sonque l’etnograf de la Lana gran", çò dison.
 
Tralhaires va virar almens fins en 2019 e val la pena d'ajudar a lo menar a bon tèrme, per la qualitat dels artistas, per la granda mesa en valor de l'òbra d'Arnaudin, e per la memòria del país.
 
 

 
 

---

Per collaborar amb lo projècte Tralhaires, clicatz aicí.