Lo 28 de novembre passat, l'Universitat Nacionala Autonòma de Mexic (UNAM) aculhiguèt un eveniment politic interessant. La candidata indigenista e anticapitalista María de Jesús Patricio Martínez, dicha Marichuy, i amassava de signaturas per poder concórrer a las eleccions federalas de Mexic previstas lo 1r de julh de 2018.
 
Marichuy, que demest d'autras causas afirma que "Mexic es una nacion pluriculturala, e es doncas pas possible de bastir un país sens los pòbles d’origina", encoratgèt dins son discors lors estudiants de "luchar per una educacion gratuita e de qualitat".
 
Marichuy foguèt elegida lo mes de mai passat pel Congrès Nacional Indigèna de Mexic e assegurèt que sa campanha la sostendriá lo pòble car recebriá pas d'argent de l'Institut Nacional Electoral.
 
En genièr passat, lo Congrès Indigèna, compausat de 66 pòbles d’origina, anoncièt que presentariá una femna coma candidata a l’eleccion presidenciala de Mexic en 2018. La candidata benefícia del sosten de l’Armada Zapatista de Liberacion Nacionala (EZLN, segon sa sigla en espanhòl).
 
La campanha se centrarà sus la lucha contra lo trafec de dròga e per la defensa de las tèrras. “Volèm que l’indignacion, la resisténcia e la rebellion sián suls bulletins de vòte en 2018”, çò ditz lo Congrès Indigèna, qu’amassa las 66 nacions que luchan ensems per poder viure en acòrdi amb lors culturas.