Lo contraròtle espanhòl de la Generalitat a empedit la mesa en marcha del servici integral aranés de las urgéncias de pompièrs.
 
Coma cada 4 de decembre, los pompièrs d’Aran an festejat Santa Barbara, qu’es lor santa patrona. Coma los pompièrs son aimats e presats del pòble e de las institucions, lor fèsta es totjorn un eveniment màger del país de cap de Garona.
 
La celebracion comencèt, coma d’abitud, amb la passejada dels camions dels pompièrs per las carrièras de vilas e vilatges amb las sirenas que clantisson. En mai de la messa e de l’omenatge als pompièrs mòrts, pompièrs, autoritats e ciutadans festegèron amassa dins lo pargue dels pompièrs de Vielha. Los actes foguèron presidits pel sindic d’Aran, Carlos Barrera, pel director general de la prevencion e de l'extincion d’incendis a la Generalitat de Catalonha, Juli Gendrau, e pel director general de Pompièrs e Emergéncias, Joan Canalias.
 
 
L’intervencion espanhòla
 
Mas lo servici pròpri aranés de Pompièrs e Emergéncias es ara marcat per l’intervencion del govèrn espanhol qu’a pres lo contraròtle de la Generalitat de Catalonha. “Era situacion politica que viu Catalonha, a empedit qu’eth nau modèl de gestion integrau de Pompièrs e Emergéncies dera Val d’Aran age ja entrat en foncionament”, çò soslinhèt Barrera dins son discors, ont remarquèt qu’après dos ans de negociacions per aver una gestion pròpria d’aqueste servici public, ara èra arrestat e contrarotlat per l’estat espanhòl.
 
Pasmens, lo sindic manifestèt son esperança pels resultats de las eleccions al Parlament de Catalonha del 21 de decembre venent, e qu’un còp nomenat e restaurat lo govèrn de la Generalitat de Catalonha, “eth servici integrau de Pompièrs e Emergéncies dera Val d’Aran [poderie] entrar en foncionament” en tot remarcar “qu’ei un projècte globau e collectiu qu’er aspècte uman ei çò de mès important dera sua estructura”.