De milièrs de personas (11 000 segon los organizaires) manifestèron dissabte passat per las carrièras de París per sosténer los presonièrs d’ÈTA e reclamar la fin de las actualas politicas penitenciàrias que las aplican los estats espanhòl e francés. Jol lèma "Patz al Bascoat, ara los presonièrs", los manifestants seguissián la crida dels Artisans de la Patz, lo collectiu que facilitèt lo desarmament d'ÈTA l'8 d'abril passat a Baiona (Bas Ador).
 
Dins lo cortègi se vesiá de drapèls bascos e d'afichas que demandavan l'amnestia e lo retorn dels presonièrs a l'ostal. Lo collectiu Etxerat dels parents dels presonièrs portava una bandeiròla giganta que disiá "Los volèm a l'ostal", en revendicant lo drech legal qu'an los presonièrs de complir lors penas dins de presons del Bascoat.
 
Demest los manifestants i aviá de representants d'EH Bildu, del Partit Nacionalista Basco (EAJ), d'EH Bai e quitament del Partit Socialista francés qu'en son nom i son anats Benoît Hamon e lo cònsol de Baiona Jean-René Etchegaray. De soslinhar la preséncia dels activistas per la patz Txetx Etcheverry e Mixel Berhocoirigoin.
 
La manifestacion finiguèt après 14h sus la Plaça Vauban ont aguèron luòc los parladisses dels divèrses representants. En general se planguèt lo silenci dels estats espanhòl e francés e las politicas penitenciàrias vindicativas, e se revendiquèt lo camin de la patz e mai se prevegèsse "long". De soslinhar los mots del president d’onor de la Liga dels Dreches de l’Òme, Michel Tubiana, que demandèt als estats espanhòl e francés de cambiar d’actitud e afirmèt que "la lucha per la patz es la vida" e que s'agissiá "pas d’oblidar lo passat ni los patiments".
 
Ara lo rendètz-vos es en genièr al Bascoat, ont se prepara a Bilbao una granda manifestacion.