Dos estatisticians venon d’analisar l’evolucion de la populacion provençala d’aquí a 2030. Se vei que Provença balança entre de ponchs fòrts e de fragilitats. Aqueleis informacions essencialas ajudan a comprene una granda part de l’avenir demografic d’Occitània.

Un estudi per anticipar la gestion dei territòris
 
Dos cercaires marselhés, Virgínia Besson e Olivier Biau, an amassat una granda quantitat de donadas per fin de preveire coma evolucionaràn leis abitants de Provença d’aquí a 2030. An fach aqueu trabalh dins l’encastre de l’Institut Nacionau d’Estatistica e d’Estudis Economics (INSEE), a la demanda de l’Establiment Public Fonzier (EPF), que sa tòca es d’ajudar lei collectivitats localas a mestrejar la gestion dei tèrras. Lei resultats son condensats dins un rapòrt disponible en linha: Portrait de la région Provence-Alpes-Côte-d’Azur (Retrach de la region de Provença-Aups-Còsta d’Azur). Vaicí lei revelacions majoralas de l’enquista.
 
 
L’aumentacion de la populacion
 
La populacion de Provença-Aups-Còsta d’Azur a ganhat mai de 2 milions d’estatjants dempuei mieg sègle: uei s’elèva a 4,9 milions d’estatjants, çò que ne fa la pus poblada dei regions occitanas: sus 15 o 16 milions d’occitans, un tèrç son provençaus... La populacion provençala montarà probable a 5,4 milions d’estatjants en 2030. Lo taus de fegonditat deuriá gaire bolegar dins lo futur e restariá, coma uei, a l’entorn d’1,96 enfant per frema.
 
Provença demòra la region pus dinamica sus lo plan demografic dempuei 1962, tant en Occitània coma dins tot l’estat francés. Mai l’arribada d’estatjants novèus s’alentís: n’i a 13 000 per an a l’ora d’ara mentre que n’i aviá 30 000 per an pendent leis ans 1970.
 
La populacion contunharà de vielhir e, probable, lei decès vendràn pus nombrós que lei naissenças. A l’ora d’ara, un provençau sus quatre a mai de 60 ans; seràn un sus tres en 2030. Aquò demandarà d’adaptar lei servicis e leis esquipaments. Maugrat aqueu vielhiment, la populacion contunharà de créisser perque lei personas que s’installaràn en Provença seràn pus nombrosas qu’aquelei que ne partiràn. Lei Bocas de Ròse son lo solet departament provençau que pèrd un pauc de populacion a l’ora d’ara, e mai s’an ganhat 720 000 estatjants en mieg sègle.
 
La densitat de populacion es maximala lòng dau litorau, que 7 personas sus 10 i vivon, amb una densitat de 1185 estatjants per quilomètre cairat.
 
 
Installacions, fugida dei cervèus, creacions d’emplecs
 
Lei novèus abitants de Provença venon sustot dau “Nòrd”, valent a dire de França. E, coma se saup, son lo soleu e la beutat dei païsatges que leis atrason. S’installan mai que mai dins lei vilas.
 
Lei cervèus fugisson, bòrd que Provença a perdut 5 000 estudiants en sièis ans: entre elei, un tèrç parton en Illa de França. Per còntra, lei quadres que venon en Provença son nombrós e, cada an, la region ganha dos còps mai de quadres que de retirats. Pasmens, encara se manca de quadres dins certanei sectors considerats “estrategics”.
 
Aqueleis informacions son fondamentalas per lo movement occitanista: li caudrà chifrar de mai en mai a de solucions per gardar lei cervèus au país e, a l’encòp, per garentir l’integracion e l’occitanizacion dei novèus provençaus que son sovent de quadres originaris de França.
 
I a pauc de trabalhadors manuaus car mai dei dos tèrç dei trabalhadors son dins lo sector terciari. La creacion d’emplecs foguèt dinamica dins leis ans 2000, abans la crisi de 2008. L’importància dau terciari a limitat lei pèrdas d’emplecs dempuei la crisi. Ça que la, la represa dei creacions d’emplecs es lenta.
 
 
Leis escomesas dei transpòrts e de l’urbanizacion
 
Fòrça provençaus son obligats de se desplaçar fòrça per beneficiar dei servicis. 82 000 personas vivon a mai d’una ora anar-tornar d’un licèu, d’un espitau o d’un ipermercat. En mai d’aquò, 41% de la populacion rurala se tròban a mai de 40 minutas anar-tornar d’aquelei servicis. Donc, lei gents de la campanha son pron desfavorizadas en Provença, coma dins l’ensems d’Occitània.
 
Lei trajèctes entre lo domicili e lo trabalh s’alòngan, qu’an aumentat de 9% en 8 ans. Aquò que pausa un problèma de pollucion automobila e met en evidéncia una insufisença dei transpòrts collectius, sustot a l’entorn d’Avinhon, entre Ais de Provença e Vitròla, e mai entre Marselha e La Ciutat.
 
Es en Provença que leis escarts entre revenguts auts e revenguts bas son mai importants a respècte deis autrei regions  d’Occitània (dins l’estat francés, la sola region que despassa Provença dins l’inegalitat sociala es l’Illa de França). De riquesas collectivas se crèan en Provença: representan 7% dau produch interior brut de l’estat francés.
 
Lei lotjaments novèus arrèstan pas d’aumentar, que Provença n’a ganhat 1,5 milion dempuei 1968. La pression fonziera demenís pas, leis aglomeracions s’estendon en rosegant lei campanhas. Per tant, de mai en mai de gents vivon luenh dei centres vila. Lo prètz dau lotjament, en mejana, monta a 3180 èuros per mètre cairat e es lo pus car d’Occitània (au nivèu de l’estat francés, sola l’Illa de França a de lotjaments pus cars).
 
 
 
 
Domergue Sumien
Fònts: INSEE, La Provence