Lo govèrn espanhòl a ordenat de restituir a Sixena 44 objèctes d'art que se tròban al Musèu de Lhèida. La Generalitat a refusat de las tornar en esperant que se resòlga un recors de la senténcia judiciària. Son de pèças que la Generalitat de Catalonha aviá crompadas mas Aragon considèra que las pòt reclamar. L'aplicacion de l'article 155 a permés que la Gàrdia Civila intre dins lo musèu e emplegue la fòrça, se cal. Los ciutadans de Lhèida an protestat energicament.
 

La Gàrdia Civila emportèt dins la nuèch de dimenge a diluns quaranta quatre objèctes d'art del musèu de Lhèida, devèrs lo monastèri de Santa Maria de Sixena. Dètz forgonetas dels gendarmas espanhòls e un camion de l'entrepresa encargada del transpòrt de las pèças prenguèron las òbras davant las protèstas dels abitants de la vila catalana. Dins lo musèu i aviá lo director general de la planificacion del govèrn d'Aragon, Ignacio Escuín, que reclamava las òbras, e lo director general del Patrimòni de la Generalitat de Catalonha, l'occitan Jusèp Boya, que qualificava lo carreg de "convòi dera espoliacion, sens mesura ne vergonha".
 
Lo jutge aviá autorizat la Gàrdia Civila a intrar dins lo musèu tre la nuèch de dimenge a diluns per prene las frescas, en emplegant la fòrça se caliá. Lo ministre de la cultura espanhòl, Íñigo Méndez de Vigo, qu'ara es de facto lo conselhièr de cultura de la Generalitat de Catalonha, aviá ordenat de portar las pèças devèrs Santa Maria de Sixena.
 
A l'exterior las protèstas començèron de créisser durant lo matin, e la polícia catalana, los Mòssis d'Esquadra, tustèron los manifestants. "Jos era ploja. Es mòssos an cargat contra era gent que pacificaments manifestaue deuant eth musèu de Lhèida e los an obligats a partir entara Rambla Aragó. Me demani se que deuen sénter aqueri òmes que carguen contra eth sòn pròpri pòble. Jos era ploja, senti ua immensa tristesa", çò planguèt Jusèp Boya.
 
Demest los manifestants i aviá sa sòrre, la deputada Mireia Boya, qu'aviá ja prevengut lo cònsol màger de la vila, Àngel Ros, que las autoritats espanholistas "volerien eth sòn butin de guèrra". En mai d'aquò, Mireia Boya demandèt a Àngel Ros que s'aprochèsse pas a mens de 500 mètres del musèu e que se'n tornèsse devèrs son ostal per totjorn. "Er estat espanhòu mos vò ajulhar, umiliar e castigar, aguest n'ei un aute exemple".
 
Àngel Ros, se presentèt al musèu, mas la polícia li permetèt pas d'intrar. Mentretant, los acampats l'increpavan en l’acusant de l'espoliacion. Ros fa partida del Partit Socialista qu'a sostengut l'aplicacion de l'article 155, del qual l'espanholisme s’es servit per prene las pèças del museu. En mai d'aquò, sos acòrdis per governar la vila amb lo partit Ciutadans an comportat un reculament de las politicas en favor del catalan.
 
De l'exili estant, lo president de la Generalitat de Catalonha a l'exili protestava sus Twitter: "De nuèch e en emplegant una polícia militarizada, coma totjorn, en se servissent d'un còp d'estat per expoliar Catalonha amb una impunitat absoluda. Vaicí lo modèl de país que defendon Ciudadanos, PSC e PP".
 
 
De pèças que las aviá crompadas la Generalitat per las servar
 
Los 44 objèctes d'art en litigi son tres caissas sepulcralas del sègle XV e quatre fragments d'un retaule d'alabastre barròc, 11 fragments d'aquel retaule, un banc e divèrsas pinturas e esculturas dels sègles XVI e XVIII.
 
L'istòria comença en 1936, quand lo monastèri foguèt atacat. Alara, un especialista d'art catalan apelat Josep Gudiol crompèt las frescas muralas per las salvar de la destruccion. S'expausèron restauradas e servadas al Musèu Nacional d'Art de Catalonha. Puèi, las monjas del monastèri vendèron d'autras pèças que las crompèt la Generalitat de Catalonha entre los ans 1983 e 1994 per las servar.
 
Una senténcia judiciària declarèt nullas las crompas d'aquelas òbras, las qu'èran al musèu de Lhèida e quitament las frescas que se servavan al Musèu Nacional d'Art de Catalonha. Pasmens, la senténcia es pas definitiva car i a quatre recorses en espèra de resolucion.
 
D’autras pèças d'art divèrsas d'aquel monastèri que se tròban dins d'autres musèus a Madrid, Toledo, Òsca, Saragossa e endacòm mai son pas reclamadas pel govèrn d'Aragon.





 
 

Tuits sobre #sixena155 #sixena #sijena