La cambra bassa del parlament britanic aprovèt dimècres passat un emendament a la fuèlha de rota del Brexit qu'aviá prevista lo govèrn de Theresa May. Lo govèrn perdèt la votacion perque una partida de sos deputats conservators joguèron en favor de l’oposicion, que demandava una lei per aplicar lo Brexit.
 
May aviá escartat de tot en tot aquela possibilitat perque, segon ela, portariá tòrt al procès de sortida de l'Union Europèa, que deuriá aver luòc lo 29 de març del 2019. Ara, lo parlament deurà aprovar lo Brexit per lei, un còp conclusas las negociacions amb las institucions comunautàrias.
 
Divendres passat s'anoncièt lo primièr acòrdi entre lo Reialme Unit e la Comission Europèa, lo que prevei una factura pel Brexit, lo mantenement dels dreches dels ciutadans europèus residents al Reialme Unit e una frontièra "sopla" entre l'Irlanda del Nòrd e la Republica d'Irlanda. Ara, los britanics deuràn acabar de negociar la sortida al Conselh Europèu.