Galhac (Galhaqués) e Fijac (Limarga e Segalar Carcinòl) recebèron dimars passat lo labèl de "vilas e païses d'art e d'istòria", atribuits per la ministra francesa de la cultura, Françoise Nyssen.
 
Segon la ministra, l'atribucion del labèl a Galhac "ven reconéisser la qualitat de las accions conduchas per aquela vila per la preservacion e la reconversion del patrimòni".
 
Per quant a Fijac, es ja una vila portaira d'aquel labèl dempuèi 1990 e ara aquesta lo vei estendut al país d'art e d'istòria del Grand Fijac, de las vals d’Òlt e de Celé. "Aquela extension permetrà de consolidar e de promòure l'identitat patrimoniala, arquitecturala e païsatgièra d'aquela intercomunalitat", segon la ministra.
 
Lo labèl de las vilas e païses d'art e d'istòria es un ret creat fa 30 ans. Recampa de vilas e de territòris "estacats a la valorizacion e a l'animacion de l'arquitectura e del patrimòni e que meton en òbra d'accions per las presentar".