Après una jornada plan agitada en Bigòrra e en Bearn, dissabte passat, la calma arribèt ièr, dimenge de matin, quand l’alèrta irange foguèt levada. Las fòrtas pluèjas de dissabte passat provoquèron una notabla crescuda del Gave de Pau dempuèi Gavarniá, e lo riu sortiguèt del sieu liech.

Lo centre de Lorda (Lavedan) foguèt innondat e calguèt barrar lo santuari amb la Tuta de Massavielha. Los ostalièrs de las doas ribas del gave faguèron evacuar los lors establiments e 427 personas foguèron plaçadas en seguretat al Palais dels Congrèsses e al Palais dels Espòrts.
 
La crescuda del gave inondèt qualques sectors de Sant Pèr de Bigòrra (Lavedan), Coarrasa, Nai e Aigon (Bearn). Quitament una femna d’80 ans foguèt presa en carga pels pompièrs a L’Estela-Bètharram (Bearn).
 
Tanben s’inondèt lo camin de fèrre Tarba-Pau e fòrça trens restèron a la gara de Pau. L’SNCF a mes en plaça d’autocars de substitucion fins al restabliment de la circulacion ferroviària, prevista per uèi.
 
 



___
Aigon [Igon]
Coarrasa [Coarraze]
Gavarniá [Gavarnie]
L’Estela-Bètharram [Lestelle-Bétharram]
la Tuta de Massavielha [la grotte de Massabielle]
Nai [Nay]
Sant Pèr de Bigòrra [Saint-Pé-de-Bigorre]