Una avalanca de protèstas se debanan en Cabilia contra la marginalizacion de la lenga amazigh, après que lo Parlament d’Argeria a refusat un emendament legal que cercava de refortir l’ensenhament de l’amazigh dins las escòlas, çò rapòrta Nationalia. Los mèdias locals parlan de manifestacions de desenas de milièrs de personas per carrièras contra lo govèrn argerian. Las protèstas comencèron fa mai de doas setmanas, mas an pres de fòrça a partir de l’11 de decembre, ont de mai en mai se pòdon entendre de crits en favor de l’independéncia de Cabilia.
 
De son costat, lo govèrn argerian assegura que las protèstas se basan sus de “rumors falsas” e assegura que l’amazigh a la plaça que li pertòca dins las escòlas argerianas dempuèi 2016, quand se declarèt lenga oficiala. E d’efièch, lo refús de l’emendament respond mai que mai a una batèsta entre diferents partits politics.
 
Totun, lo refús de l’emendament es estada la gota d’aiga qu’a fach desbordar lo vas en Cabilia ont los ciutadans patisson una marginalizacion economica, sociala, lingüistica e culturala.
 
Las manifestacions son convocadas pel Movement per l’Autodeterminacion de Cabilia (MAK) e compta amb lo sosten dels estudiants e de la societat civila. Per contra, dins qualques vilas i a agut d’afrontaments violents amb de policièrs e estudiants progovernamentals, que segon lo mèdia Siwel son de “salvatges” pagats pel “poder colonial”.