Qualques eurodeputats protestèron ièr davant la preson d’Estremera, près de Madrid, per denonciar que lor avián refusat de vesitar de presonièrs politics catalans. S’agís dels occitans José Bové e Marie-Pierre Vieu, la letona Tatjana Ždanoka, lo flamenc Mark Demesmaeker e los catalans Josep Maria Terricabras, Jordi Solé, Ramon Tremosa, Tatjana Zdanoka.
 
Dins una conferéncia de premsa facha davant la preson, e en mostrant lors passapòrts davant los mèdias, los elegits europèus denoncièron que lor avián refusat l’accès per rescontrar lo vicepresident de la Generalitat de Catalonha, Oriol Junqueras, e lo conselhièr Joaquim Forn, que se tròban embarrats dins aquela preson. O avián demandat fa qualques jorns e vegèron lor demanda refusada. Ièr se presentèron davant la preson, mas poguèron pas intrar tanpauc.
 
“Es una partida de nòstre trabalh de nos assegurar que la democracia fonciona dins totes los païses de l’Union Europèa. E tant que nos daissan pas intrar, Espanha tracta d’un biais diferent aqueles presonièrs”, çò assolidèt Bové, que remembrèt que fa doas setmanas aviá vesitat de presonièrs dins l’estat francés sens cap de problèma.
 
Los eurodeputats avián demandat tanben de vesitar los presidents de las associacions independentistas, encarcerats a Soto del Real, tanben près de Madrid, e los membres del govèrn de la Generalitat qu’èran dins las presons d’Estremera e d’Alcalá Meco, e ramentèron que dos dels empresonats, Raül Romeva e Oriol Junqueras, èran estats deputats europèus. Ça que la, los eurodeputats an solament trobat de trabucs burocratics que los an empedits de vesitar los presonièrs.