Qualques desenats de membres d’una organizacion racista e d’extrèma drecha francesa, Génération Identitaire, ocupèron dissabte passat la mosqueta de Peitieus, e dempuèi lo tech despleguèron de pancartas amb de consignas ostilas a la religion islamica dins l’Estat francés.

Dins un comunicat, l’organizacion refusa çò qu’apèlan l’“immigracion extraeuropèa e la construccion de mosquetas sus lo territòri francés”.
 
La tòca dels extremistas èra d’empedir las pregàrias de la jornada, mas fin finala quitèron l’endrech après qualques oras de negociacions amb la polícia.
 
Aquel meteis dissabte, lo ministre de l’Interior, Manuel Valls, condemnèt l’ocupacion del centre de culte e diguèt que l’Estat agirà amb fermetat davant quina mòstra que siá d’intolerància.
 
Tanben lo primièr ministre Jean-Marc Ayrault, que se tròba en una tornada per Asia, refusèt amb fermetat aquela “provocacion que revèla un òdi religiós inacceptable”.
 
Aqueles faches son arribats qualques setmanas après la publicacion, dins lo setmanièr francés Charlie Hebdo, de qualques caricaturas ofensivas contra lo profèta Maomet, çò que desfermèt una granda indignacion entre los cresents musulmans. Las autoritats francesas ne justifiquèron la publicacion per garentir la libertat de premsa, mas enebiguèron las manifestacions de protèsta de la comunautat islamica.
 
La mosqueta granda de Peitieus es emplegada sonque parcialament pr’amor qu’es dins la fasa finala de la siá construccion.