Qu’ei la fin escandalosa de l’ahar deu clòt e de las graulhas en Peiregòrd. En efèit, La Cort de Cassacion que vien de regetar lo recors d’Annie e Michel Pecheras, lo coble proprietari deu famós clòt a Grinhòls (Landés). Se ve’n brembatz, los lors vesins que portèn lo clam en 2012 pr’amor las graulhas que hasèn tròp de brut! Après annadas de pelejas juridicas, lo verdicte finau qu’estó prononciat dijaus passat: los proprietaris que deven de tira boçar lo clòt, vielh de cent ans. Un finau incredible, sustot quand òm sap que lo còde de l’environament que defen d’ac har pr’amor que i a espècias protegidas aquí dehens (ueit exactament). Deu còp, que seràn condemnats se ne boçan pas lo clòt, mes que’n seràn tanben s’ac hèn! Perdents a cada còp...ua situacion inedita, ubuesca mes sustot revoltanta suu hons. De mei, lo coble que deberà pagar los frais de justícia deus vesins e tanben 150 èuros d’astrenta per dia on lo clòt n’ei pas boçat...Ua vergonha sancèra. Qu’esperam totun la seguida, en tot esperar que n’i aja ua.
 
Peu moment, sol un adobament “a la bona” e permeteré d’escapar a la decision de jutícia, mes dab vesins atau, que serà pelut, probable!
 
Mantuas associacions ecologistas que demoran totun investidas sus aqueth dorsièr, e qu’espèran un sostien deu ministre de la transicion ecologica Nicolas Hulot, abans, se besonh, de sollicitar ua jurisdiccion europèa.
 
 
 
 
Joan-Nadau Commeres