Una veitura de la polícia municipala provoquèt la mòrt d’una jove prostituta nigeriana quand foguèt violentament percutida per un menaire qu’aviá passat un fuòc roge, dimenge passat, a Niça.

Lo presumit menaire, qu’èra pas sol, abandonèt la siá veitura e fugiguèt. Foguèt interpelat en cò sieu a Vidauban (Draguinhanenc), segon çò que raportèt a l’AFP lo cònsol de Niça, Christian Estrosi, qu’indiquèt tanben que l’òme aviá una taxa d’alcolemia nauta.
 
Lo cònsol tanplan raportèt que los tres policièrs municipals foguèron menats a l’espital. Dos ne sortiguèron amb de contusions e lo tresen es mai seriosament ferit, mas la siá vida es pas en perilh.
 
Lo veïcul de la polícia municipala de Niça davalava dimenge, cap a 3h30, lo Baloard Gambetta, dins lo centre de Niça, quand foguèt percutit dins un caireforc per una veitura qu’aviá passat lo fuòc roge. Lo menaire piquèt talament fòrt la veitura municipala que la projectèt contra l’immòble de l’angle ont se trobava la prostituta, que moriguèt sul còp.
 
La còla de nuèch de la polícia municipala èra a trabalhar sus un afar de panatòri de veitura.