A Auckland, a dos passes de l’estadi dels Warriors (l’esquipa neozelandesa d’NRL) se quilha lo sèti de la Federacion neozelandesa. Al bas, se trapa lo musèu del XIII en Nòva Zelanda. Las veirinas a travèrs de documents fotografics tornan sus la naissença del XIII dins lo país. Se trapa una tièra de malhòts, de trofèus, las malas de fusta qu’èran balhadas als jogaires que partissián en virada dels Kiwis… Programas de partidas, afichas e panèus explicatius completan l’ensemble qu’un guida afogat de XIII vos explica e comenta amb plan de vam. Un ecran torna passar de partidas d’uèi o d’un còp èra. Atal, quand i passèri, se podiá veire un França-NZ de 71 jogat a Brutus.
 
A Sydney tanben, es al bas del sèti de la Federacion, a dos passes del Sydney Cricket Ground e de l’ANZ-Stadium, que se trapa lo musèu de l’NRL. Mai grand de segur que lo primièr, amb encara mai de documents e panèus d’explica sus mai de 110 ans d’istòria. Entre los reportatges vièlhs difusats, descobriretz lo sorire de Puig-Aubert aprèp una victòria dels Pols suls Cangorós.
 
En 2017, poguèrem véser la supèrba mòstra sul XIII realizada pels Archius Departamentals de Tarn, mas es de manca un luòc permanent de memòria, d’explica, d’istòria e de transmission del XIII pels territòris occitan e catalan. Un talhièr novèl per la Federacion?
 
 
 
Alan Roch