Lo jornalista flamenc Rudi Vranckx, que foguèt correspondent a Mossol, a agut una idèa reüssida per tornar la jòia e l’esperança als refugiats que visquèron jos l’autoproclamat Estat Islamic. Son projècte es fondat sul poder de la musica e cèrca de donar a aqueles refugiats l’oportunitat de practicar aquel art dins d’escòlas bèlgas. Per finançar aquel projècte s’es lançat una plataforma en linha apelada Imagine Home (imagina l’ostal), ont se pòt crompar de nòtas musicalas d’una pèça compausada per un musician bèlga en collaboracion amb de joves refugiats sortits de Mossol. A mesura que se crompa de nòtas se revèla la melodia e s’ajuda a portar la musica a aquelas personas.
 
“En tres ans d’ocupacion de Mossol, l’Estat Islamic tuèt pas solament de gents. Tuèt la libertat, l’esperança e la jòia, e destruguèt lo camin per las tornar bastir: la musica”, çò ditz Vranckx dins lo sit del projècte.
 
D’efièch, l’Estat Islamic aviá enebit de jogar de musica.
 
Lo projècte seguís l’idèa iniciala del meteis jornalista flamenc, just après la liberacion de Mossol. Alara lo correspondent entamenèt la campanha nomenada “Imagine Mosul” (imaginatz Mossol) que reüssiguèt a amassar d’instruments que se portèron a l’escola de musica de la vila.