Lo president de Peró, Pedro Pablo Kucynsky, a autrejada una gràcia a l’èx-president perovian Alberto Fujimori. Un conselh medical ne recomandèt la liberacion a causa d'una malautiá evolutiva, degenerativa e incurabla. Fujimori, qu'ara a 79 ans, foguèt condemnat en 2007 a una pena de vint e cinc ans de preson per la mòrt e la sequestracion de desenas de personas durant sa presidéncia (1990-2000) dins l'encastre de la lucha victoriosa contra la guerrilha del Partit Comunista Perovian, tanben conegut coma "Caminòla Luminosa".
 
"Lo president de la Republica, en vertut de las atribucions que li conferís la Constitucion politica de Peró, a decidit de concedir la gràcia umanitària a Sénher Alberto Fujimori", çò a raportat lo govèrn perovian dins un comunicat.
 
Fujimori foguèt menat dissabte passat dins un espital perque respondiá pas al tractament per una davalada de tension arteriala. "Un conselh medical oficial a avalorat lo presonièr e a determinat que Sénher Fujimori patís una malautiá evolutiva, degenerativa e incurabla e que las condicions de preson significan per el un grèu risc sus sa vida, sa santat e son integritat", çò apond lo comunicat.