Lo nòu govèrn d’Àustria —una coalicion de conservators (ÖVP) e d’ultradrechistas (FPÖ)— permetrà als sud-tiroleses de lenga alemanda o ladina de demandar lo ciutadanatge austrian sens aver de renonciar a l’italian. Lor programa de govèrn argumenta que se basa sus  “l’esperit de l’integracion europèa” e sus la foncion “protectritz” qu’a Àustria envèrs los sud-tiroleses germanofòns. Lo nòu cancelièr austrian, Sebastian Kurz, promet d’aplicar la mesura “solament en estrecha cooperacion amb Itàlia”. Lo govèrn italian a criticat la decision, en la qualificant “d’etnonacionalista” e en prevesent que pòsca aver “d’efièches fòrça grèus”, coma se passèt “als Balcans”.
 
Fasiá de decennis que los partits germanòfons de Sud-Tiròl demandavan la mesura, e totes l’an saludada. Lo Partit Popular de Sud-Tiròl (SVP) soslinha que la decision favorís una Union Europèa mai estrecha e enfortís a l’encòp los ligams del Sud-Tiròl amb Àustria. Libertat Sud-Tirolesa o considèra coma un eveniment “istoric” e los Libertaris an remembrat que demandar lo passapòrt austrian serà entièrament volontari.
 
Los partits germanòfons an 27 sètis suls 35 del parlament de Sud-Tiròl, una província autonòma d’Itàlia que faguèt partida d’Àustria fins en 1918. Aqueles partits son favorables a un raprochament de Sud-Tiròl amb la rèsta de Tiròl e d’Àustria. L’SVP vòl aumentar l’autonomia sud-tirolesa en Itàlia, del temps que Libertat Sud-tirolesa e los Libertaris defendon la secession, siá per se reintegrar a Àustria, siá per constituir un nòu estat independent.
 
 
 

---

Aquesta nòva es adaptada de Nationalia, amb qui Jornalet ten un acòrdi de cooperacion