Una femna de 35 ans perdèt divendres son enfant en lo portant al mond dins la veitura, sus l’autoestrada A20, quand anava cap a una maternitat de Briva, en Lemosin, a causa de la manca de maternitat pròche La Capèla de Marival (Limarga), dins lo nòrd de Carcin. La jove femna, qu’èra prems de sèt meses, enfantèt dins la veitura. Quand los pompièrs arribèron, constatèron que l’enfanton èra mòrt.

En residissent dins lo vilatge de La Capèla de Marival, al país de Limarga, qu’es dins lo nòrd de Carcin, la jove femna deguèt causir entre las maternitats de Vilafranca de Roergue, de Caors e de Briva. Las tres maternitats son a una ora de rota. La femna viatjava acompanhada del sieu marit, e aviá pres la direccion de Briva en seguissent los conselhs de son ginecològ, que l’aviá consultat pauc abans a Fijac (Tèrrafòrt).
 
L’endeman del drama, la jove femna èra en estat de chòc al centre espitalièr de Caors.
 
Lo president francés, François Hollande, a demandat una enquèsta administrativa amb la tòca de “conéisser plenament las circonstàncias d’aquel drama” que “nos apèla a acceptar pas res en matèria de desèrt medical”, çò declarèt lo president francés pendent lo congrès de la Mutualitat Francesa amassat a Niça. “Cap de francés deu pas demorar a mai de trenta minutas de suènhs d’urgéncia”, çò apondèt lo president, en repetissent un engatjament de sa campanha presidenciala.
 
Per un mètge carcinòl, aquel drama pausa la question de la manca de maternitats dins lo departament d’Òlt, qu’amb 170 000 abitants, a sonque una maternitat a Caors (Carcin Blanc), dempuèi la barradura en 2009 de la maternitat de Fijac (Tèrrafòrt) e qualques ans abans de la de Gordon (Boriana).
 
“L’enfantament dramatic” d’aquela femna illustra “l’aspècte nefast dels ragropaments de maternitats”, çò declarèt dissabte la Coordinacion Estatala per la Defensa dels Espitals e Maternitats de Proximitat. La reorganizacion de l’ofèrta de suènhs privilègia, de fach, lo ragropament dels servicis medicals e cirurgicals, dotats d’esquipaments modèrnes, sovent en d’establiments nòus o renovats, plaçats la màger part dels còps dins las grandas vilas.
 
Segon lo president de la coordinacion, Michel Antony, “dos tèrces de las maternitats an barrat los darrièrs vint ans”. Segon Antony, entre uèch e nòu departaments an qu’una sola maternitat. Aquel movement exigís una moratòria “per analisar çò que se passa, per que se faga lo balanç” dels ragropaments. “Quand se barra un servici, dins de zònas ruralas o urbanas, los autres professionals de la santat partisson, i a una fugida”, çò diguèt, en arribant a la conclusion que “degun ganha pas amb la barradura de servicis”.
 
De son costat, lo president del sindicat estatal dels ginecològs obstetricians, Jean Marty, planguèt “la degradacion globala de la perinatalitat”, un sector “plan mal gerit”. Lo mètge tanben planh que los mejans “se son concentrats a l’entorn de las capitalas regionalas”.
 
Segon un estudi publicat aqueste octòbre per la Direccion de la Recèrca, dels Estudis e de l’Avaloracion e de las Estatisticas (DREES), Òlt es un dels departaments ont “mai de la mitat de las femnas enfantan a mièja ora o mai de lor abitatge”. Aquel estudi apond qu’un cinquen de las maternitats de l’Estat francés barrèron entre 2001 e 2010.