L’InÒc Aquitània ven de presentar la campanha de vòts d’ongan “Bona Annada 2018!”. Coma cada an, se tracta d’afichar la lenga occitana amb lo messatge calorós de la “bona annada” adreiçat al public general, que conescan la lenga o pas, e e de la far venir presenta dins la vida vidanta del país.
 
Se comencèt de distribuir las afichas lo 26 de decembre e aquestas son disposadas entrò fin de genièr. S’agís d’afichas en 4 formats, lo grand (120x175cm) pels abrics de bus o supòrts municipals, mejan (60x80cm) per qualques collectivitats que o an demandat, e pichon (A3) per d’autobuses e partenaris institucionals e associatius. En mai d’aquò an publicat tanben de cartas postalas.
 
Ongan, la campanha prend una novèla partença amb un visual mai grafic, que l’InÒc definís coma una reflexion entre creacion grafica e identitat, via lo ligam entre la lenga e la cultura occitanas.
 
Aquela campanha existís dempuèi 2003 e cada an ten mai de partenaris, çò que la fa grandir, e rend de mai en mai presenta la lenga dins lo païsatge lingüistic d’Occitània. A l’ora d’ara la campanha la sostenon lo CIRDÒC, l’ÒPLO, los conselhs departamentals dels Pirenèus Atlantics e Nauts Pirenèus e tanben las regions qu’an pres lo nom d’Occitània e de Nòva Aquitània.