Los primièrs ministres d’Eslovaquia e de Chequia creson que la separacion pacifica de l’anciana Checoslovaquia poiriá èsser un bon exemple per d’autres estats, en tot mençonar exprèssament Espanha e Catalonha. L’eslovac Robert Fico e lo chèc Andrej Babis, aqueste totun nascut dins l’actuala capitala d’Eslovaquia, o diguèron divendres passat dins una conferéncia de premsa a Bratislava a l’ocasion de la commemoracion del 25n anniversari de la rompedura, en 2003.
 
Dempuèi alara, se pensan que las relacions entre los dos païses vesins qu’un còp èra formèron Checoslovaquia son excellentas e que la separacion foguèt pas traumatizanta. “Pòt èsser un exemple de seguir per fòrça païses que cèrcan la separacion”, çò diguèt Fico, segon Associated Press.
 
Lo 1r de genièr de 1993, Checoslovaquia se devesiguèt dins lo nomenat Divòrci de Velós. Foguèt un procès pacific, que la negociacion e lo dialòg regnèron a tot moment. D’efièch, lo quite Václav Havel, president de la republica elegit après la Revolucion de Velós declarèt dins una entrevista, lo 16 d’abril de 1991, que se lo pòble eslovac voliá viure dins un estat independent, ni los chècs ni el lor refusarián pas lo drech de o far.
 
Pendent la prima de 1991, la question nacionala del pòble eslovac foguèt al centre de la crisi del govèrn eslovac e del Movement Public Contra la Violéncia, que se desseparèt en un grop bailejat per Vladimir Meciar, que fondèt la plataforma Movement per una Eslovaquia Democratica (HZDS). Aquela fòrça politica accediguèt al govèrn eslovac dins las eleccions de junh de 1992 e entamenèt las negociacions amb lo govèrn chèc per la particion de la republica.